The Definitive Guide to Living in the Capital , Cairo , Egypt

بعد الشغل قررنا نخرج نقعد مع أصحابنا شوية في المعادي. كنا جعانين وعايزين ناكل، ومعرفناش نطلب إيه. بس ريحة الكريب اللي دخلت علينا حسمت القرار. وشدينا العزم على سيتي كريب المعادي.

أولًا المنيو بتاع مطعم سيتي كريب مليان، وفعلًا هيخليك تحتار تطلب إيه. طلبنا كريب “فراخ كتيوشة” حار (32 جنيه)، علشان اسمه غريب مش أكتر. وطلع كريب خضروات وموتزاريلا ورومي، مع فراخ حارة عن طريق رش فلفل أحمر. طعمه حلو ولكن مش مميز قوي، وتحس إنه ناقص له لمسة علشان يبقى مميز زي اسمه. كان ممكن يتضاف زعتر أو غيره من التوابل، أو الفراخ كانت تتعمل بزيت الزيتون. فيه أكتر من اختيار يخلي الطعم أحلى من كده.

كمان جربنا “كريب ميكس جبن”، وده عبارة عن جبنة رومي مع موتزاريلا وشرائح الشيدر بالخضروات (25 جنيه). كان حلو وخفيف في أكله، وأطرافه مقرمشة. بننصحكم انكم تجربوا النوعين طبعًا، ومش بياخدوا أكتر من 7 دقائق للتسوية. لكن كفاية في كل مرة واحد كريب بس، لو انت مش أكيل. لأن أكلهم متخدم عليه كويس وهتشبع من أول كريباية.

سيتي كريب عندهم تقريبًا 66 فرع منتشرين في كل حتة في القاهرة. وفرعهم الرئيسي في مدينة نصر. تقدروا تعرفوهم كلهم من صفحتهم على فيسبوك. وده لينك المنيو والفروع.