The Definitive Guide to Living in the Capital , Cairo , Egypt

رنا شرف

رمضان شهر اللمة والبهجة، ومفيش أحلى من قضاء سهرة مميزة في مكان أثري له طابع خاص. المرة دي قررنا نروح صاحب السعادة في فرعه بشارع المعز، اللي مش بس مطعم، لكنه كمان مسرح بيقدم فقرات فنية ممتعة تناسب أجواء رمضان.

أول ما تدخل المكان، هتحس بطاقة إيجابية من الديكورات الشرقية واللوحات المكتوب عليها صاحب السعادة، مع لمسات الأرابيسك اللي بتديك إحساس إنك في حتة من الزمن الجميل. المكان كبير، مكون من طابقين ورووف واسع بيطل على أجواء شارع المعز، لكن لو كان فيه أسانسير كان هيكون أسهل لكبار السن والأطفال، لأن السلالم عالية شوية.

الحفلات والفقرات الفنية
الحفلة بتكون في الرووف، وتذكرتها سعرها 250 جنيه، لكن لو مش حابب تحضرها، تقدر ببساطة تروح تشرب حاجة أو تتسحر في المطعم. واللي عجبنا إن الفقرات كانت متنوعة ومليانة روح رمضانية، منها:

طرب شرقي مع تخت شرقي وأغاني قديمة أصيلة، وفقرة نوبية مميزة بملابس تقليدية وأغاني تفاعلية جميلة، ودبكة لبنانية أضافت أجواء حماسية مختلفة، ده غير الفقرة الأفريقية اللي فيها إيقاعات مميزة وحيوية.

السحور والأكل
جربنا وجبة السحور الشرقي، وكانت أكتر من رائعة. الأكل سخن وطازج، وده حاجة مهمة جدًا، خصوصًا إننا طلبنا فول، طعمية، جبنة بالطماطم، زبادي، بطاطس محمرة، وكل ده بسعر 250 جنيه والوجبة تكفي شخصين، وده سعر ممتاز لمكان سياحي في قلب القاهرة.

وأخيرًا..
تجربة صاحب السعادة في رمضان كانت ممتعة، وفعلا تستحق التكرار. لو بتدور على مكان يجمع بين الأجواء الرمضانية الأصيلة، الفنون المختلفة، والأكل اللذيذ، يبقى لازم تحطه في خطتك لخروجات رمضان السنة دي.