The Definitive Guide to Living in the Capital , Cairo , Egypt

من أهم القواعد اللي بنحبها دايمًا في خروجاتنا في كايرو 360 إن المكان يكون مريح ومبهج والأكل والمشروبات تكون حلوة، علشان كدة فرحنا بتجربتنا في مطعم ستديو مصر، وحسينا إننا اختارنا المكان الصح! لأن القعدة على نيل القاهرة كانت رائعة، والأكل كمان كان مميز رغم بعض الملاحظات. خلال السطور الجاية هنقول لكم على تفاصيل تجربتنا في مطعم ستديو مصر.

ستديو مصر موجود في مركب نايل سيتي، يعني على النيل مباشرةً، وموجود وسط مجمع مطاعم، وهو مكان كلاسيكي وهتحسوا فيه أنكم رجعتم لزمن قديم لكن بطابع عصري.

المكان فيه أوبن إيريا، ودي للناس اللي بتحب قعدة الهواء الطلق، وفيه كمان مكان داخلي علشان لو الجو مش مناسب ليكم تقدروا تقعدوا فيه، وعندهم فريق عمل مميز ودايمًا موجود لخدمتكم.

بدأنا تجربتنا في المكان بطاجن ورق عنب بالكوارع وسعره كان 128 جنيه، وورق العنب كان بيدوب في البق والكوارع طعمها حلو، بس كان نفسنا يبقى فيها جوزة الطيب، وكمان جربنا منسف لحمة، بسعر 128 جنيه، وللأسف حسينا طعمه عادي مافيهوش أي حاجة مميزة، وخلينا نقول إنه كان محتاج يبقى فيه بصمتهم علشان يطلع بشكل مختلف.

ومن ضمن تجربتنا كمان طلبنا ورقة لحمة وسعرها 168 جنيه، وخلتنا من فرط الجمال ندوب عشقًا! تتبيلة صح وطعم جميل وتسوية ممتازة، أما بقى فتة الفراخ كان سعرها 117 جنيه، والحقيقة ماعجبتناش قوي، ومحتاجين يشتغلوا عليها أكتر علشان تكون أحسن من كده.

وكمان طلبنا شواية لحوم وكان سعرها 398 جنيه، وفيها تشكيلة لحوم مشوية بتنزل بنارها زي ما بيقولوا لأن الشواية بيكون تحتها فحم للحفاظ على سخونة الأكل، والمشويات بلا استثناء كانت مميزة وتستاهل التجربة، وفتة الموزة الضاني كان سعرها 233 جنيه، وهي طعم ولون وريحة كلهم أحلى من بعض، تستاهل السعر وطريقة التقديم وكل حاجة جميلة، لأن مش أي حد يعمل موزة ضاني بدون مشكلة فيها.

بعد ما خلصنا الأمل قررنا نجرب الحلو، وكانت تجربتنا عبارة عن طبق “قشطلية” اللي سعره 56 جنيه، وبيتكون من مهلبية بالقشطة والعسل والمكسرات مع آيس كريم وموز، ورغم إننا كنا خايفين من مكونات الطبق أنها تكون تقيلة ولكن ظننا خاب وطلعت القشطلية أخف حاجة حلوة ممكن ناكلها بحب.

كمان جربنا أم علي بالفستق وسعرها كان 41 جنيه، ورغم أنها حلوة ولكن كانوا محتاجين يزودوا المكسرات شوية، لأنها كانت قليلة قوي، خصوصًا كمية الفستق.

تجربتنا بشكل كامل أسعدتنا، ورغم الأجواء الشتوية إلا أن الجو كان لطيف في الإيريا المغلقة وكمان الخدمة عندهم ممتازة وفيه سرعة في أداء فريق العمل.

وتقدروا تعرفوا أكتر عنهم من خلال صفحة الفيسبوك من هنا.