-
50 شارع جمال سالم، أمام روجادا
-
عالمي
-
-
12 ظهراً - 1 صباحاً -
Angie El Batrawy
كل ما نفكر فى المكتب نأكل أكل نظيف
وصحي.. نقعد نلف وندور.. وندور ونلف وفى الآخر نرجع لاختياره ثاني.. مطعم «سباجو»
الموجود فى شارع جمال سالم المواجه للبوابة الرئيسية لنادي الصيد فى الدقى أثبت
أنه متميز سواء فى الخدمة أو فى جودة الأكل اللى تفوقت –فى رأينا- على أشهر مطعم
بـ يقدم نفس الأصناف والروح “سبكترا”.
زي ما قلنا طبيعة الأطباق شبه
اللى ممكن تلاقيها فى “سبكترا” ومثيلاتها لكن بـ يزيد عليها أصناف جديدة
للأطباق الرئيسية زي السكالوب زوكيني وده عبارة عن 200 جرام من شرائح لحم مشوية عليها
كوسة (الزوكيني هى الكوسة باللغة الإيطالية) ومغطاة بجبنة موتزاريلا سايحة،
والمقبلات زي فريش مشروم أون توست (17.99 جنيه) وشريمب أون توست (34.99 جنيه).
مالناش تجربة سابقة فى مكان
المطعم، لكن هـ نشارككم تجربتنا مع خدمة التوصيل اللى ما خذلتناش واتأخرت غير مرة
واحدة، وده وارد أنه يحصل لكن دائمًا جودة الأكل فى النهاية بـ تعوضنا عن كل شيء،
قائمة الطعام ممكن تلاقوها على الصفحة بتاعتهم على
الفيسبوك.
كنا مجموعة كبيرة يوم ما طلبنا
الأوردر، وبالتالى كانت فرصة كويسة أننا نجرب تشكيلات مختلفة من الأطباق، طلبنا كومبو
تشيكن (49.99 جنيه) ودي بـ يكون فيها قطعتين فراخ واحدة مقلية والثانية مشوية
ومعاها 2 صوص، وهيكورى تشيكن (49.99 جنيه)، والجديد كمان عندهم سي فوود كانيلونى (49.99
جنيه)، ورولز الجمبري والسمك (69.99 جنيه) وفييل زوتشيني (64.99 جنيه) اللى ذكرناه
لكم قبل كده.
بدون الدخول فى تفاصيل كل طبق،
“سباجو” بـ يتميز بأن كل مكوناته طازجة: الخضار.. السوتيه والأرز
والبطاطس المحمرة اللى بـ تنزل كطلبات جانبية مع الطبق كلهم ما يتخيروش عن بعض فى
حرفية الصنع، اللحوم والفراخ مخدومة ومستوية جدًا وبصفة عامة الأكل بـ ييجي ساخن
خاصة لو طلبت شوربة زي شوربة كريمة الفراخ (10.99 جنيه) والطماطم (نفس السعر)
واللى بـ ييجي معاها ليمون وقطعة كبيرة خبز توست عليها زيت الزيتون، السلاطات كمان
(بـ تتراوح من 19.99 إلى 44.99 جنيه) عندهم مميزة والصوصات اللى بـ تيجي معاها،
كله مضبوط بالمسطرة.
فى التحلية دائمًا بـ نشوف
الصنف الأشهر على الإطلاق الأوريو مادنيس (24.99 جنيه)، لكن الجديد هنا كمان أن
فيه تشيز مادنيس (24.99 جنيه) ودي بـ تكون تشيز كيك لكن معمولة بطريقة الأوريو
مادنيس، رهيبة.. حلوة جدًا. وفيه كمان جديد فى الحلويات النوجا جلاسيه (19.99
جنيه) والتشوكليت لافا (29.99 جنيه).
قيمة خدمة التوصيل 5 جنيه وبـ
توصل فى حوالى ساعة إلا ربع وبـ تختلف حسب قرب أو بعد المكان. وأفضل حاجة أنهم بـ
يبادروا بكسب رضاء العميل قبل أى شيء، يعني لو طلب وصل لك غلط أو فيه مشاكل بـ
يبعتوا واحد بدل منه على طول وبدون مقابل.
وأنت فى شغلك وحابب تأكل أكل صحي
وأسعاره لطيفة شوية وطازج أكيد “سباجو” هـ يكون على قائمة اختياراتك زي
ما هو محتل المرتبة الأولى عندنا.
