سانتا لوتشيا فرع التجمع
سانتا لوتشيا.. مطعم يوناني بطعم الإسكندرية في القاهرة
خروجات في القاهرة سانتا لوتشيا التجمع مطاع التجمع مطاعم يونانية في القاهرة نقد مطعم سانتا لوتشيا-
هايد بارك، التجمع الخامس
-
يونانى
-
-
11:00 - 23:59
Cairo 360
رنا شرف
مطعم سانتا لوتشيا معروف جدًا لأهل الإسكندرية، وهو من المطاعم الراقية والشيك هناك، علشان كدة انبطسنا جدًا لما عرفنا إنه فتح مؤخرًا في القاهرة. سانتا لوتشيا هو مطعم يوناني، والشيف الرئيسي فيه يوناني، لكن باقي فريق العمل مصري، والأطباق في المطعم مش بس يونانية، لكنها متنوعة وبتعبر عن ثقافات مختلفة.
تعالوا نعرف أكتر تفاصيل تجربتنا في سانتا لوتشي فرع القاهرة!
أول ما هتدخل المطعم هتحس إنك في جزيرة يونانية، وهتسمع أجمل مزيكا يوناني، وهتشوف ديكور يوناني جدًا. حرفيًا أنت في جو تاني.
اللون الأبيض غالب ومسيطر علي المكان، والترابيزات عليها شموع جميلة هتخليك تحس إن الموود العام للمكان رومانسي وهادي.
فريق العمل مبتسم وودود، ودي حاجة تفتح النفس لما تروح أي مكان وبتحببك فيه أكتر.
نيجي بقى للأطباق! طبعًا بما إننا في مطعم يوناني يبقي لازم ندوق الجريك سلاد، واللي كانت مكونة من جبنة فيتا وزيت زيتون وخس وطماطم وزيتون. كانت بجد لذيذة. بس خدوا بالكم إن الكمية كبيرة، يعني لو كنت شلة ننصحكم تطلبوا طبق واحد وهيكفيكم كلكم، سعرها 125 جنيه.
طلبنا معاها سلاطة طحينة، وكانت مختلفة شوية عن الشائع، فيها توابل مودياها في سكة تانية عن الطحينة العادية، كمان لونها مختلف. سعرها 55 جنيه.
كمان ماينفعش مابنجربش السلاطة الخضرا، وكانت لطيفة وفيها قطع خبز أقرب للفتوش، ودي سعرها 90 جنيه.
طلبنا كمان شوربة سي فود، كانت حلوة والكريمة قوامها حلو، سعرها كان 125 جنيه.
طلبنا سمكة بالبطاطس والكريمة، وده طبق مميز لازم تجربوه، عجبتنا جدًا وحسينا إنها معمولة بمزاج عالي، والصوص اللي عليها كان رائع، وسعرها 516 جنيه.
بشكل عام تجربتنا في سانتا لوتشي كانت مميزة، وأكيد هنزور المكان ده تاني.
