The Definitive Guide to Living in the Capital , Cairo , Egypt

في الفترة الأخيرة انتشرت ثقافة الأكل الصحي بشكل كبير في مصر، ومش شرط أنه يكون في سن معين؛ الأمهات بـ يحاولوا دائمًا يقدموا لأطفالهم أفضل وأحسن أكل، كمان الشباب اللي بـ يحاول يحافظ على جسمه وصحته من عشاق الأكل الصحي والمختلف، فما تلاقيش فئة معينة هي اللي مهتمة بالأكل الصحي زي زمان لما كان الأجانب أو اللي قضوا أغلب حياتهم بره مصر بس هم اللي بـ يأكلوه.

ولأننا من عشاق الأكل الصحي، كنا لازم نفرح جدًا لما نعرف أن سالاديرو – Saladero فتح فرعه الجديد في شارع 9 في المعادي.

المكان في النصف مابين  نعناع وConcerto في شارع 9 اللي كنا كتبنا عنهم قبل كده، والمعروف عن سالاديرو أنه المكان الوحيد اللي تقدر تكون فيه السلاطة بتاعتك بالمكونات اللي تناسبك. أول ما بـ تدخل هـ تلاقي حوالي 4 ترابيزات بره المكان وترابيزتين جوه، صحيح المكان صغير، بس أنت ممكن تطلب طلبك وتأخده معاك أو تطلبهم دليفري.

الحقيقة أننا احتارنا كثير قبل ما نقرر هـ نطلب إيه، لأن غير السلاطات فيه كمان ساندويتشات وWrap، فـقررنا أننا هـ نجرب كل حاجة.

قلنا نبدأ بأننا نكوّن السلاطة بتاعتنا بمزاج فـطلبنا علبة سلاطة كبيرة بـ 23 جنيه، وحطينا فيه مكرونة وصوص honey mustard وكابوريا ومشروم بـ 5 جنيه، وروست بيف بـ 10 جنيه، وجبنة شيدر بـ 5 جنيه، وذرة بـ 5 جنيه. المكونات كلها كانت فريش جدًا وممتعة برغم أن شكلها في بار السلاطات كان ممكن يعطيك إحساس بعكس ده.  وصوص الـ Honey mustard كان أصفر زيادة عن اللزوم ولما سألنا ليه نسبة المسطردة أكبر من الباقي عرفنا أنها لما بـ تقدم باردة بـ تكون كده، لكن لما بـ تقدم مع حاجات سخنة كصوص جنب المقبلات بـ يبقى لونها أبيض مع العسل والمايونيز. طلبنا كمان من منيو الساندويتشات chicken parmigiano بـ 22 جنيه، واللي مكونة من فراخ مشوية على الجريل وموتزاريلا وروست بيف ومايونيز مع عيش بني أو أبيض زي ما تحب، بس ما كانش فيه موتزاريلا فـبدلها لنا بجبنة شيدر. وطلبنا كمان Wrap buffalo chicken بـ 17 جنيه، واللي مكون من قطع فراخ محمرة مع جزر وبروكلي وجبنة ريكفورد أو بلو تشيز بس برضه للأسف ماكنش فيه بروكلي أو جبنة ريكفورد فـحطينا بدلها جبنة شيدر، وكان نفسنا نطلب كمان أوميجا سالمون والمفروض أنه بالأفوكادو بس برضه ماكنش فيه فـما طلبناهوش.

للأسف المرة اللي زرناهم فيها كان فيه مكونات كثيرة مش موجودة زي الموتزاريلا والأفوكادو وأغلب أنواع العصير والفاكهة إلا الليمون بالنعناع.

وطبعًا ما كانش عندنا اختيار غير أننا نجرب عصير ليمون بالنعناع أو أي نوع من المشروبات الغازية الجاهزة، فـطلبنا 2 عصير ليمون بـ 17 جنيه الواحد، والحقيقة أنه طعمه كان مميز فعلًا، خاصة أنه معمول بنعناع مزروع في قصاري الزرع اللي بره في المكان، يعني ضربوا عصفورين بحجر واحد، قصاري زرع للديكور وتنفع في المشروبات.

تجربتنا في سالاديرو كانت مميزة، كنا نتمنى بس وجود كل المكونات اللي مكتوبة في المنيو علشان نستمتع أكثر بتنوع وصفاتهم.