The Definitive Guide to Living in the Capital , Cairo , Egypt

«روبي تيوزداي – Ruby Tuesday» من الأماكن المحببة لقلوبنا سواء فى رمضان أو أى شهر، وعلى قائمة أماكن الـ American Diner، مشهور فى رمضان بنظام البوفيه المفتوح لكن السنة دي غير النظام تمامًا مما أحبط الناس على الفيسبوك لأنه كان متميز جدًا لدرجة أننا كتبنا عن تجربتنا في فرع الجيزة، وكمان لهم فرع في سيتي ستارز الناس بـ تقف أمامه Waiting list بالطوابير.

رحنا الفرع اللى فى مول العرب المرة دي، المول قبل الإفطار يمرح فيه الخيل، هادئ وفاضي علشان محلات كثيرة بـ تقفل خاصة “سبينيز”، مش متعودين على مول العرب بالشكل ده، لازم تحجز بالتليفون قبل ما تروح لأن المكان بـ يكون على آخره، السنة دي رمضان فى روبي Set Menu بـ 135 جنيه للفرد بدون الـ 12% خدمة شاملة ضريبة المبيعات، يعني إجمالى حوالى 152 جنيه للفرد، المنيو ممكن تشوفوها من على صفحة الفيسبوك.

فيه حاجات فى المنيو بـ تقدم لك كلها، وفيه حاجات أنت بـ تختار منها: المشروبات لك اختيار بين قمر الدين أو التمر هندي أو الكركاديه، وبرضه الشوربة إما تشيكن ريزو أو مشروم (شوربة البطاطس ما كانتش موجودة)، السلاطات عبارة عن بار مفتوح بـ تختار منه اللى أنت عاوزه وممكن تروح تملأ طبقك ثاني، منها سلاطات روبي المميزة ومعاها سلاطات ثانية مختلفة، المقبلات بـ ينزل لك الاختيارات كلها: سمبوسك لحم وجبنة وكبيبة وسبرينج رولز.

فى الأطباق الرئيسية لك اختيار واحد طبعًا من قائمة الفراخ أو اللحم أو السي فوود، التحلية فى الآخر برضه موجودة فى البوفيه بـ تختار اللى أنت عاوزه من حلويات شرقية أو فاكهة فريش أو جيلى.

لازم توصل هناك قبل الإفطار بساعة علشان تطلب ويلحقوا ينزل لك على الآذان، قبل الإفطار بـ ينزلوا لك العصير الرمضاني، المياه المعدنية خارج المنيو، لو عاوز اطلب (حجم صغير بـ 8 جنيه)، وبـ ينزل لك الشوربة وتمر، حركة الجرسونات كانت زي خلية النحل، وفيه صوت واحد عالى بـ يشهل الشيفات عند المطبخ اللى فى نهاية المكان صوته كان طاغى على صوت التليفزيون.

الشوربة والمشروبات كانت حلوة جدًا، بعد ما نزل لنا المقبلات والأطباق الرئيسية وحطينا الحلو و السلاطة على الترابيزة اتخضينا من الكميات، نراهنكم أنكم لازم هـ تأخذوا أكل معاكم Take Away لأن الكمية كثير على فرد واحد، من الأطباق الرئيسية أخذنا بلاكند تشيكن ودي عبارة عن فراخ مشوية عليها قطع صغيرة مانجا وفلفل ألوان وبطاطس بيوريه وخضار سوتيه، وكمان بيف تندرولين (240 جم) عليها صوص كريمة بالليمون، البيف الصراحة كان أحلى من الفراخ، طعم المانجا مع الفراخ كان خرافة بس كنا حاسين أن الطعم ناشف قوي كان محتاج صوص أو أى حاجة تخلى الطعم Juicy شوية، لكن مافيش كلام على مذاق الطبقين، امتياز روبي تيوزداي.

في الحلويات كان لنا تعليق صغير على الفاكهة اللى كانت ذبلانة شوية خاصة الموز اللى كان فيه أجزاء مستوية، مش عارفين ده تأثير الحر ولا إيه على الرغم أن المول مكيف! بس بصفة عامة إحنا استمتعنا بالخدمة والسرعة والجودة وبـ نرشح روبي زي كل سنة.