The Definitive Guide to Living in the Capital , Cairo , Egypt

“مافيش غلطة”.. أنا باتكلم بجد.. المكان ده مافيهوش غلطة،
كل اللي نفسك فيه هـ تلاقيه، ولو اللي نفسك فيه مش موجود يجيبهولك، ده كان إحساسنا
وإحنا قاعدين في «رمضانا – Ramadana»
في «التراس – The Terrace»
داخل مدينة «ديزاينوبوليس – Designopolis»
على طريق مصر إسكندرية الصحراوي.

على بعد 5 دقائق من القرية الذكية، وأنت ماشي في طريق مصر
إسكندرية الصحراوي، هـ تلاقي ديزاينوبوليس على أيدك الشمال، هـ تمشي حوالي 4 كيلو
عقبال ما تلاقي U-Turn
وتدخل من مدخل خاص يدخلك على المدينة، مش هـ تغلب كثير تدور على المطعم لأنه بـ
يتوسط المباني كلها وموجود في الواجهة.

المكان كبير جدًا، ويغلب عليه اللونين الأبيض والرمادي
موظفين بشكل جيد جدًا مع بعض بشكل مريح للعين، ما بين القعدات فيه ممر محفور في
الأرض عامل زى بحيرة صغيرة مع الخضرة حواليك في كل حتة وفيه حتة ثانية فيها شلال
نازل من الحائط، المبنى موجود أمامه كذا منطقة قعود: مكان عبارة عن ترابيزات وكراسي
شفافة شيك قوي، والثاني ترابيزات عالية وكنب أبيض، والثالث كنب وترابيزات بيضاء
برضه في نفس مستوى بعض.

المكان واسع وتقسيمته هائلة، وفيه وحدات الإضاءة شغلها
رقيق قوي مدلاة من عامود وحدات القعود فعاملة جو شاعري رائع جنب منظر الغروب اللي
عمرك ما هتنساه والهواء الدافئ اللي بـ يبدأ يلطف مع حلول المغرب.

في المنتصف فيه بار مربع كبير فيه
جرسونات كثير ومحطوط على طرفه 3 دورق زجاج فيه مشروبات
رمضانية: كركديه وقمر الدين، “رمضانا”
وفرت في الخيمة كل وسائل الراحة، وكمان وسائل الترفيه زي العروض الفنية الحية، ركن
بلاي ستيشن، ألعاب الطاولة والشطرنج وخلافه، لكن للأسف ما كانش حد بـ يلعب أي من
الألعاب دي وإحنا هناك.

على الترابيزة منيو السحور اللي
بـ يقدموه، والأفطار هناك أوبن بوفيه، الفرد بـ 160 جنيه شاملة الخدمة والضريبة،
أول ما المدفع بـ يضرب يعدي عليك الجرسون بكل أدب يطلب منك تتوجه إلى البوفيه،
وقبلها بـ ينزل لك سلة عيش بلدي فيها طبق صغير فيه قراسيا ومشمشية، الناس هناك
ناصحين أنهم مزجوا بين امتياز أن رواد المكان قاعدين في مكان مفتوح وفي نفس الوقت
الأكل صحي في مكان مقفول ودافئ.

البوفيه عبارة عن 3 ترابيزات طويلة
ما بينهم ممر والمطبخ على الشمال وأنت داخل، أول ترابيزة عليها الشوربة، الثانية
عليها الأطباق الرئيسية: أرز، خضار (فاصوليا، وجزر) محطوطين بشكل فني قوي، مكرونة
مقصوصة بالصوص الأحمر، فراخ مشوية، وفراخ ثانية بالصوص، كفتة ولحمة بالصوص،
وسمبوسك خضار وجبنة وكبيبة وغيرها كثير، الترابيزة الثالثة مقسمة لاثنين: واحدة
عليها السلطات الباردة بكل الأنواع، حتى أن فيه خضار مقطع ومحطوط لوحده علشان كل
واحد يختار على حسب مزاجه، النصف الثاني من الترابيزة للتحلية وفيها أم على وفروت
سلاد، وحلويات شرقية بأنواع مختلفة.

وأنت بـ تأكل مش مشكلة لو خلصت
المشروب بتاعك لأن الجرسون هـ يعدي عليك يسألك حابب ثاني ولا لأ، الـ Staff هناك بجد مش طبيعي، مافيش حاجة
نفسك فيها غير لما تلاقيها جاءت لك، ودائمًا عينهم عليك علشان لو محتاج حاجة أو
يشيلوا الأطباق اللي فضيت.

مافيش حاجة في الأكل وحشة، الشيف
عندهم إيده تتلف في حرير، كل حاجة لها مذاق خاص، إحنا لسه فاكرين طعم الخضار
والفراخ بالصوص فى فمنا لحد دلوقت وإحنا بـ نكتب النقد ده، وفي التحلية أم علي
وهمية ورحنا أخذنا مرتين من الفروت سلاد.

الشاشات دائمًا مشغلة قناة “القاهرة
والناس”، الجو جامد جدًا والهدوء بـ يعم المكان رغم أن فيه صوت للشاشات، وبعد
الأكل الجرسون بـ يعدي عليك يسألك عاوز تشرب شيشة ولا لأ.

في رمضانا هـ تستمتع
بالأجواء الرمضانية الحقيقية سواء مع عائلتك أو أصدقائك، وهـ تعيش حالة من
الاسترخاء والاستمتاع هـ تحب أكيد تكررها كل فترة.