The Definitive Guide to Living in the Capital , Cairo , Egypt

أخر مرة روحنا “رافيش-Ravish” وتحديدًا فرعهم في الكوربة انبسطنا من المكان والبرجر المعمول بمزاج. لكن في زيارتنا الجديدة حاجات كتير اتغيرت عن زيارتنا السنة اللي فاتت، والتغيير للأسف كان للأسوأ. يعني خد عندك مثلًا: فرع الكوربة قفل وراح بالم هيلز الشيخ زايد.

هو الفرع هناك أقرب لمطعم برجر تيك آوت، يعني هتلاقي كاونتر طويل قصاده ترابيزة وكرسي عبارة عن علبة خشب وبينهم مسافة صغيرة جدًا تكفي فرد بالعافية، وخارج المطعم موجود ترابيزتين. ديكورات المكان بسيطة وجميلة وكلها باللون الأبيض والحيطان عليها ألواح خشب بالعرض، ومتعلق في السقف شوية فوانيس وحبال. الحاجة الوحيدة الباقية من فرعهم القديم هي المطبخ المكشوف وراء الكاشير.

لفت انتباهنا وإحنا بنشوف المنيو ساندويتش الفراخ المشوية بالأناناس والترياكي، لكن للأسف ماكانش متاح يومها. الغريب كمان الساندويتش ده ماكانش الوحيد غير المتاح، وتقريبًا نص المنيو ماكانتش متوفرة وبكده كنا بنختار بين خمسة ساندويتشات وصنفين جانبيين. قررنا في الآخر نطلب ماك أند تشيز بومب (52 جنيه) وتكساس تشيز فرايز (54 جنيه) من المقبلات.. ومعاهم سموكي بيكون (69.5 جنيه) وسبايسي ميكسيكان (69.5 جنيه) ومشروم (69.5 جنيه).

فجأة وإحنا هناك الكهرباء قطعت، وعلشان كده فيه حاجات اتأخرت زي حلقات البصل، بس إحنا برضه استحملنا.

قبل ما نتكلم عن الأكل لازم نشكر صاحب فكرة العلب اللي بتتقدم فيها ساندويتشات البرجر، اللي لما بتفتحها بتتحول لطبق تقدر ترجعه مرة تانية لشكلها الأصلي بعد ما تخلص أكل. بصراحة إحنا مفتقدين شكل المطعم القديم والحجر الرمادي المميز للمكان.

بدأنا حفلة البرجر مع السبايسي ميكسيكان برجر اللي بيتكون من قطعة البيف وعليها شريحة جبنة شيدر مشطشطة وهالوبينو وبصل مكرمل ومايونيز شيبوتل وأفوكادو وطماطم وخس. صحيح العيش كان خفيف وهش، بس المشكلة إنه كان ناشف شوية وصعب المضغ. المشكلة دي ماكانتش الوحيدة؛ البرجر كان من غير أفوكادو وبصل مكرمل، وكمان الجبنة مش سايحة خالص.

تاني ساندويتش معانا هو المشروم اللي عليه بصل مكرمل ومشروم سوتيه وصوص مايونيز ديجون. هو الساندويتش فعلًا كان مملح شويتين، بس الجميل في الموضوع كان نكهة البصل المكرمل المدخن وطعمه المسكر، ويا سلام عليه مع طعم المشروم القوي. نقطة أخيرة: الصوص كان قليل.

بصراحة كنا متوقعين إن السموكي بيكون برجر يكون أقل من المتوقع علشان مشكلة الكهرباء وحلقات البصل، لكن واضح إننا كنا غلطانين؛ الساندويتش ماكانش أحسن حاجة، بس الأكيد إنه من أجمل الساندويتشات اللي فيها صوص باربيكيو وبيكون اللي جربناها من فترة طويلة، والفضل يرجع للبيكون المقرمش وكمية الصوص المضبوطة اللي عملوا شغل عالي مع الشيدر المدخنة.

أخيرًا وصلت المقبلات، ومرة تانية كانت المشكلة إن التكساس فرايز نزلت من غير الشيلي بيف، وكمان تأكدنا إنهم خلاص مش هيعملوا حلقات البصل اللي بتنزل مع السموكي بيكون برجر.

التكساس فرايز رغم إنها من غير لحمة مفرومة والجبنة كانت قليلة جدًا بس طعمها كان لذيذ، والحلو فيها إنها مقرمشة من بره ومستوية كويس من جوه لكن كل اللي كان ناقصها شوية ملح.

نروح للماك أند تشيز بومب المكون من خمس قطع مكرونة بالجبنة مقلية، واللي للأسف طعمهم كان أقل من المتوقع ومحروقين شوية من بره وكمان ناقصهم طعم الجبنة المهم في طبق من النوع ده. النقطة الإيجابية الوحيدة كانت الحشو.

بصراحة مش عارفين نقول إيه، يعني النواحي السلبية إن معظم المنيو كانت مش متاحة يومها والمكان الغير مريح أو مناسب للقعدة وكمان اللحمة نفسها مش زي زمان. عندك كمان مشكلة قطع الكهرباء يومها اللي عملت ضغط زيادة على الموظف الوحيد هناك.

جايز هتفهموا من كلامنا إن الموضوع كله محبط، بس إحنا معندناش مانع نطلب مرة تانية من رافيش، بس على شرط يكون تيك أوت.