The Definitive Guide to Living in the Capital , Cairo , Egypt

فى الدور العلوي لجاليريا 40 بالشيخ زايد وعلى نفس صف مطعم "جابيز – Gaby’s" موجود مطعم "ذا بييت – The Beat"، شكله الخارجى ما تقدرش تخمن منه طبيعة الأكل أو المطبخ اللى بـ يقدمه لكن شكله جذاب جدًا يشدك أنك تدخله، دخلنا وعرفنا أنه مطعم إيطالى والجو العام كان مريح نفسيًا خاصة أنه محاط بزجاج شفاف بـ يتيح لك تتفرج على المنظر الجميل اللى بره.

ديكور المكان بسيط وشيك، الـ Cover على الترابيزات عبارة عن أسطوانة موسيقى (بتاعة زمان اللى لونها أسود)، المنيو كانت لطيفة وتفاصيل أطباقها واضحة، مقسمة زي أى منيو إيطالى، ولكن الفكرة والتغيير فى طبيعة ومكونات الأطباق، فيه فى السلاطات أنواع كثيرة لكن ممكن تروح بار السلاطات وتحط المكونات اللى أنت حاببها (30 جنيه)، وفيه عناصر زي الجمبرى أو الفراخ لو أضيفت بـ يكون فيه قيمة زيادة لها على حسب ما الجرسون المهذب وضح لنا، وده اللى عملناه.

من الأطباق الرئيسية طلبنا ذا بييت ويلنجتون (120 جنيه) وده عبارة عن قطعة بيف ويلنجتون مستوية وعليها صوص من البصل لكن داخل عجينة هشة "شورت كرست" زي اللى بـ يتعمل منها "فطيرة التفاح" وبـ ينزل معاها بطاطس محمرة وخضار سوتيه، وكمان طلبنا كريمي تشيكن باستا (65 جنيه) فيها طماطم مجففة.

أول حاجة رحنا عملنا السلاطة بتاعتنا، حطينا فيها 4 أنواع من الخس (بعضها مستورد) مع شوية Sweet Corn وفلفل ألوان وبروكلى وCapers، كلها كانت خضروات بسيطة، قعدنا اتسلينا شوية فيها لحد ما الأكل ييجي اللى للأسف تأخر أوى، وقعدنا فترة زهقانين وجعانين، بس لما جه الأكل اتبسطنا لأن شكله ورائحته كانت مبهجة، ماعدا أننا اتفاجئنا بأرز بدل البطاطس المحمرة، ولما سألنا الجرسون قال لنا أن بـ ينزل اختيارنا واحدة من الاثنين لكن استغربنا لأن ده اللى كان مكتوب فى المنيو والجرسون ما قالناش أن فيه اختيارات، بس هما كانوا ذوق جدًا وبدلوه على طول.

البيف ويلنجتون كان أكثر من رائع، فطيرة هشة ولونها ذهبي جواها أجمل قطعة لحمة مستوية تمام ممكن تذوقها فى حياتك، والصوص اللى كان على اللحمة من فوق (وداخل الكرست) كانت طيبة جدًا وأضافت كثير للطعم، الخضار السوتيه كان رائع والبطاطس جات بعد وقت برضه بس لحقناها مع باقى الأكل، مقرمشة وحلوة لكن عادية، الباستا كانت حلوة جدًا والصوص كان كريمي وقوامه مضبوط والطماطم المجففة أضافت للطعم كثير.

بعد الأكل ييجي الحلو، كان فيه أصناف كثيرة جدًا لكن المتاح منها كان اثنين منهم ذا بييت بومب مع إضافة بولة آيس كريم فانيليا (45 جنيه) ودي عبارة عن كيك براونيز خفيف مع صوص شوكولاتة وعليها الآيس كريم من فوق، المشكلة الأساسية للتحلية دي مش الطعم، الفكرة فى أنها كانت محطوطة فى كوب صغير ومليان على الآخر، وبالتالى كل ما تحط الملعقة الصغيرة فيها كل الصوص بيتساقط من الجوانب، وبالتالى مش عارفين نستمتع بالتجربة كاملة، وقعدنا فى الأول حريصين أنها ما يضيعش منها كثير على الطبق بره، كمان كانت ثقيلة أوى وطعم صوص الشوكولاتة مع الكيك ثقيل، مش التحلية المفضلة لنا خالص!

الحاجة الأخيرة اللى استوقفتنا لما جاء لنا الشيك فى الآخر، لقيناهم حاسبين السلاطة بـ 30 جنيه وكل عنصر أو item زيادة بـ 10 جنيه! يعني 3 قطع بروكلى اللى حطيناهم بـ 10 جنيه، الذرة الحلوة بـ 10 جنيه، والـ Capers بـ 10 جنيه، وبالتالى سعر السلاطة النهائى ما كانش يفرح الصراحة وعلى كميات خضار غير منطقية، عبرنا عن ضيقنا للجرسون المسئول لكنه كان مهذب جدًا واستمع لكل تعليقاتنا على الأكل والحساب، واستجاب لطلبنا وحذف الأسعار الزيادة من السلاطة، عامة هنا عارفين ودارسين كويس يعني إيه العمل على رضا الذبون.

ذا بييت لسه فى الـ Soft Opening وبالتالى هما مرحبين لأى تعليقات أو تغييرات، المنيو كمان بـ يتم تغييرها بناء على التعليقات دي، المكان حلو والخدمة ممتازة والجو العالم للمكان مريح، اتبسطنا على الرغم من شوية المطبات اللى واجهتنا هناك!