The Definitive Guide to Living in the Capital , Cairo , Egypt

بعد ثورة الكنافة بالمانجو المجيدة، بدأت معظم محلات الحلويات والمخابز تبهرنا كل سنة بأفكار جديدة عصرية للحلويات الرمضانية زي القطايف والبسبوسة.

صحيح في أماكن كتير عملوا تعديلات كتيرة على الحلويات الرمضانية المعروفة عشان يمشوا مع التيار، لكن قليلين اللي قدروا يبتكروا حاجة جديدة عليها القيمة تتكتب باسمهم. واحد من الناس دي “باتر هاف أند كو-The Batter Half & Co.” اللي كان في قائمة جوائز اختيارات محرري كايرو 360، فطبعًا كان لازم نروح ونشوفهم عاملين إيه السنة دي.

باتر هاف مش بس كرروا حلوياتهم المميزة من السنة اللي فاتت زي البسبوسة دوم وتارت الكنافة بالشوكولاتة/ البلح، ومخروط الكنافة. السنة دي عندهم ابتكارات جديدة زي: بلح الشام محشي نوتيلا، أو بسكويت لوتس وتعديلات جديدة على البسبوسة والأرز باللبن.

في الأول طلبنا واحدة من حلويات السنة اللي فاتت، وهي تارت الشوكولاتة بالكنافة (26.70 جنيه). ودي  عبارة عن ثلاث طبقات كنافة بينهم شوكولاتة داكنة. بصراحة الطبق ده خلاص أثبت نفسه عند باتر هاف أند كو، خصوصًا إن الطعم القوي اللاذع للشوكولاتة، كان متوازن مع طعم الكنافة المسكرة المقرمشة.

أما الحلويات الجديدة فجربنا منها بلح الشام المحشي (9.51 جنيه/ للقطعة). والحشو بيكون حاجة من اتنين، نوتيلا أو بسكويت لوتس. صحيح النوتيلا ثقيلة ومسكرة، لكن البسكويت طعمه هايل وخصوصًا إن طعم البسكويت ماشي مع عجينة بلح الشام المقرمشة.

الانسجام ده للأسف مش موجود في حاجات تانية زي البسبوسة بالأرز باللبن، أو البسبوسة بالزبادي والتوت، اللي بيتباعوا في كاسات بلاستيك مستطيلة (26.70 جنيه). الكاس الأولاني كان بسبوسة في القاع، وعليها طبقة من الأرز باللبن، وعليها جوز هند مبشور. والأرز باللبن كان لذيذ بس مش مسكر، والبسبوسة برضه مش مسكرة. المجمل إن طعمه مش مضبوط.

كاس البسبوسة بزبادي التوت كان أقل من المتوقع. وده عبارة عن طبقتين بسبوسة، بينهم كريمة بنكهة التوت، وعليهم كريمة مخفوقة. يمكن لما تشوف اسم الطبق هتفتكر إنه حاجة حلوة خفيفة، بس بعد ما دخلنا في طبقة الكريمة والبسبوسة، كنا عايزين جالون مياه نطفي بيه عطشنا. بالنسبة للطعم فمفيش أي وجود للتوت، والأغرب إن طعم الطبق كان عامل زي قمر الدين، فحسينا إن الموظفين هناك بيقولوا معلومات غلط.

أخر حاجة جربناها هي الكريم كراميل (26.36 جنيه)، ورسمت فرحة في وشوشنا. الكريم كراميل هناك مختلف عن أي مكان تاني. يعني الطبق بيتقدم مقلوب في برمة صغيرة، بحيث الكراميل يكون من تحت والبودينج من فوق. مع شوية جبنة بيضاء على الوش. بصراحة الكريم كراميل كان أحلى حاجة جربناها خصوصًا مع البودينج الكريمي اللذيذ، وصوص الكراميل الرائع.

في آخر كلامنا عن حلويات باتر هاف أند كو الرمضانية، ممكن نقول إن فكرة دمج البسبوسة مع حاجات تانية مكانتش ناجحة. بس الفكرة إنهم قدروا يبتكروا أفكار جديدة، زي بلح الشام. وفي نفس الوقت حافظوا على مستوى الكنافة بالشوكولاتة والكريم كراميل. من الآخر الناس اللي بتحب الأفكار المطرقعة لها نصيب والناس الكلاسيكية لها نصيب.