The Definitive Guide to Living in the Capital , Cairo , Egypt

زيارتنا التانية لمطعم دوار فرح في المهندسين كانت مش مختلفة كتير عن الزيارة الأولى، المكان لسه محافظ على جودة الأكل، والموظفين أسلوبهم راقي ومحترم، وفعلًا تحس إنك في بيتك.. تفاصيل مغامرتنا هناك هنقولها لكم في السطور الجاية.

أول ما وصلنا دوار فرح استقبلنا الموظف في الدور الأرضي بابتسامة ترحاب جميلة، وسألنا نحب نقعد فين فاختارنا الدور الأول العلوي، المكان فوق كان تقريبا فاضي على عكس الدور الأرضي.

المكان جميل وديكوراته بسيطة، المشكلة الوحيدة هو وجود فرن مخلية درجة الحرارة عالية شوية.

نزلت لنا السلاطات مع عيش سخن جميل بيميز دوار فرح، عجبتنا جدًا الطماطم المتبلة، كانت معمولة بطريقة هايلة، المشكلة الوحيدة إن كان فيها توم كتير وده ممكن يتعب أي حد عنده قولون، أما العيش فكان طعمه رائع.

طلبنا شوربة عدس (ثمنها 20 جنيه) الحقيقة إحنا من عشاق شوربة العدس وجربناها في أكتر من مكان لكن فعلًا نقدر نقول إن دوار فرح نجح يبهرنا بأجمل شوربة عدس، كانت كل مكوناتها مظبوطة، والكمية معقولة، ده غير إن سعرها مناسب جدًا.

ندخل بقى على التقيل.. فرخة مشوية ومخلية (ثمنها 160) ودي من المرات القليلة اللي كنا طايرين من الفرح بسبب طعم الفراخ المشوية، لونها الذهبي اللي يجنن، وتوابلها المظبوطة، وفعلًا كانت لسة معمولة حالًا وده خلى طعمها طازة وطرية.. الحقيقة استمتعنا بيها جدًا.

طلبنا معاها ورق عنب (20 جنيه) كان سخن وتوابله مظبوطة، يمكن الكمية قليلة شوية لكن غير كده عجبنا جدًا، أما الأرز بالكبدة (35 جنيه) فكان مش سخن، والأرز نفسه طعمه غريب كأنه بايت، علشان كده مقدرناش نكمله للآخر. وحسينا إنه أسوأ حاجة في تجربتنا.

الحلو كان أرز باللبن، ودوار فرح مشهور بالحلو اللي بيعمله مخصوص، الكمية كانت كبيرة، وطعمه مظبوط، ثمنه (20 جنيه).

أكتر حاجة عجبتنا في المكان –طبعًا بعد الأكل- هو احترافية الموظفين في المكان، بيعاملوك بطريقة فيها حب واحترام لدرجة إنك بتبقى حابب تقعد شوية في المكان، وماتمشيش على طول.

تجربتنا في دوار فرح كانت إيجابية، وفكرتنا بمتعة تجربتنا الأولى اللي كانت من حوالي سنتين، وهنكرر التجربة تاني وتالت.