The Definitive Guide to Living in the Capital , Cairo , Egypt

مطاعم القاهرة للمأكولات البحرية دائماً عليها كلام. فى أى مناسبة لازم يقارنوها بمحلات بلاد بره، اللى بـ تطل على البحر مباشرة، والنتيجة غالباً مش لصالح المصريين. يمكن الأكلات البحرية فى مصر لها هيبة وأهمية كبيرة، لكن بـ ينقصها العناية بالأكل نفسه.

مع تطور مفاهيم الأكل فى بلدنا بسرعة رهيبة، والتأثيرات الكثيرة اللى متركزة علينا من كل العالم، الغريب منها والكلاسيكى، قدرت مطاعم المأكولات البحرية فى القاهرة تثبت قوتها ومكانتها فى السوق أكثر وأكثر.

ذا سموكرى The Smokery (القطامية)

متحاولش تجربه لو بـ تدور على أكلة سمك مصرية أصلية، عشان تخصص ذا سموكرى فى نوع السمك المميز؛ السلمون. سر الطبخة مسئول عنه الشيف Vincent Guillou – المعروف من أيام تاماراى-  وبـ يقدم فى المنيو كل حاجة بداية من سالمون بصوص التارتار لغاية سالمون بمكرونة tagliatelle الإيطالية، مع مجموعة بسيطة رائعة من أكلات غير السلمون. المشكلة الوحيدة هى الأسعار المولعة.

فلاينج فيش Flying Fish (العجوزة)

مع إن مكتب كايرو360 له موقع مميز، بس إحنا أول ناس تعترف إن العجوزة مش أرقى مكان فى القاهرة. رغم الكلام ده، أكيد خبراء أكلات السمك يعرفوا فلاينج فيش كويس. فلاينج فيش بـ يقدم أسعار مافيش زيها –جمبرى مشوى بـ 55جنيه – بس شكله العام مش لطيف، لكن ده مش مهم عشان بـ يعوضه الأكل الرائع والخدمة الممتازة.

لا سيرينا (هليوبوليس)

من وقت قريب، الواحد كان بـ يعانى لحد ما يلاقى مطاعم راقية بعيد عن إطار فنادق هليوبوليس، بس لا سيرينا قدر من فترة يقدم أكلات بحرية جيدة- والحكم لك طبعاً. المطعم رغم ضيق مساحته بشكل رهيب، والديكورات قديمة، بس قدر يخلق جو عتيق خلاب مناسب لأكلاته.

فانديرا (المعادى)

فانديرا يجمع بين فلسفة الطبخ الشرقية والغربية، وهو مطعم تيك أواى مشهور فى المعادى. كل حاجة بـ يقدمها «فانديرا» بدايةً من ساندويتشات السى فوود لغاية الأطباق بـ تتحضر بكل عناية، وحرفية ولمسة فنية رائعة. بـ ننصح بطبق صويا تونا ستيك- مطبوخ كويس للون الوردى العصارى المميز.

سمكمك (المهندسين)

كثير هـ يقولوا إن ولا فرع من فروع «سمكمك» فى القاهرة يقدر يوصل لمستوى فروعه الاسكندرانية، بس تفضل السلسلة المحبوبة تقدم واحدة من أجمل تجارب أكلات السمك فى المدينة. تقريباً مافيش حاجة معقدة فى سمكمك – فى الأول والأخر هى سلسلة مطاعم – بس هو دائماً مميز من ناحية الجودة.

حلقة السمك (الزمالك)

هو أقرب مطعم سمك للبحر، وعلشان كده حلقة السمك بـ يستغل موقعه القريب من النيل على مركب نايل سيتى فى الزمالك. ومع الطلة على وسط البلد – تحديداً مبنى ماسبيرو- حلقة السمك بـ يسمح لزواره يختاروا وجباتهم من بين فرشة سمك ولا أحلى.

بومودورو  (وسط البلد)

نشأة كايرو360 كانت تقريباً مع بومودورو؛وشوفنا من ساعتها تطوره من محل بلدى صغير، على رصيف، لغاية مطعم كبير- بس برضه لسه محافظ على الطابع الشعبى. بغض النظر، بومودورو عنده جمهور كبير من الأجانب وسكان وسط البلد، مع أطباق مكرونات السى فوود المميزة للمطعم. ضيف على كده أن الأسعار معقولة جداً.

 إحنا بـ نحب القاهرة، بس هـ نحس أننا متحيزين لو ماقولناش على شوية مطاعم جامدة فى الاسكندرية. طبعاً فيش ماركت له فروع كثير فى القاهرة، بس الإسكندرانية بـ يحكوا ويتحاكوا على فرع بحرى، و سانتا لوشيا بـ يعمل أطباق سمك روعة، بس أجمد أكلة سمك جربناها فى مصر كانت فى فرع سمكمك فى راس التين.

 قبل ما نقولك بالهنا والشفا، بـ ننصحك وبشدة تغسل إيدك كويس بعد الأكل- ما فيش أسوأ من رائحة السمك على إيديك.