دليل كايرو 360 لأفضل 10 مطاعم في القاهرة لعام 2015
Nagla Ashraf
السنة اللي فاتت كانت مليانة افتتاحات لمطاعم كثيرة زورناها بعد الافتتاح بفترة -متخفيين كعادتنا- وكتبنا لكم عنها، وفيه منها القديم اللي لسه محافظ على مستواه وفرحنا بده، ومنها اللي للأسف ما قدرش يكمل زي ما بدأ، وكعادة نهاية كل سنة اختارنا لكم أفضل 10 مطاعم لعام 2015 من مطابخ مختلفة متعونا بأكلاتهم وحرفيتهم وخدمتهم.
مافيش حاجة ذوقناها فى المكان ده وطلعت وحشة أو حتى نص نص، كل حاجة إيطالية 100% لدرجة أن كثير من المكونات بـ يجيبوها من إيطاليا مخصوص، كل حاجة معمولة بحب وبروح إيطالية صافية، لو رحت هناك اوعى تفوت الريزوتو اللى بعد ما بـ يتعمل بـ يتقلب في قالب جبنة كبير مستورد مخصوص من إيطاليا، وكُل وادعي لنا.
فتح من فترة قريبة جدًا في المعادي وخلينا نقول أنه فعلًا قدر يضبط مزاجنا في كل حاجة متعلقة بالبرجر، من أول اختيارك للمكونات لحد ما بـ يوصل لك الطبق، الحاجة الوحيدة اللي زعلتنا أن الساندويتش حجمه صغير شوية هو والبطاطس، بس جودة ممتازة مافيش أحسن منها.
فيه ناس ما تعرفش تعمل أكل وحش، من الناس دي مطعم "كازلاك" اللي لسه فاتح جديد في كورت يارد المعادي، وبـ يشجع الاقتصاد المصري بأن كل حاجة عنده في المطعم مصرية، لو أنت أكيل بجد وبـ تعرف تفرق بين نوع الأكل اللي يمزجك واللي أي كلام، تبقى هـ تنبسط جدًا هناك، لأن كل حاجة معمولة بمزاج ومهنية.
المكان ده سحرنا بألوانه وأصناف أكله المختلفة، ما تعرفش تصنف أكله بمطبخ معين، بس الأكيد أنك مش هـ تندم أنك رحت هناك، لأن من أول العصائر لحد الحلو بـ يقدم لك سيمفونية متكاملة من العزف المنفرد للأكل الجميل.
كل مرة نروحه نفتكر أنه ممكن مستواه يقل لكن دائمًا المكان ده بـ يبهرنا بالجديد اللي بـ يقدمه، والمكونات السرية اللي عنده في كل طبق، لو جربت مكرونة هـ تنبسط، بيتزا هـ تتمزج، حتى الحلو هـ ينقلك لمملكة الجمال الخاصة به اللي مافيش زيها لحد دلوقت.
برانش أند لانش – Brunch & Lunch
كان حظنا حلو أننا جربنا نفطر يوم في برانش أند لانش واللي نجح أنه يعمل فطار محترف ومتكامل مافيهوش غلطة، وكمان الغداء عنده تحفة، ولو رحتم اوعوا تفوتوا الـ Carrot cake كتحلية.
من النادر جدًا أنك تلاقي مكان بـ يقدم لك سوشي وستيك في نفس الوقت، لأن في الأغلب هـ يبقى فيه حاجة أحسن من حاجة في المكان، لكن وان أوك أثبت لنا عكس ده بأنه فعلًا عمل المعادلة الصعبة ومزج بين جمال السوشي وطعمه المختلف، وحرفية تسوية وتقديم الستيك بكل تتبيلاته وصوصاته.
لما نيجي نتكلم عن أكل الشارع مافيش أحسن من لا فندي يدلعنا بساندويتشات الكفتة والسجق والكبدة، وبـ ينوع لك في أنواع العيش والتحابيش علشان ما تزهقش من جمال أكله أبدًا، وأسعاره مش غالية كمان.
لما نيجي نتكلم عن الأكل المصري، لازم نعطي الجائزة الأولى لتاجوري في المنيل لأنه فعلًا في مدة قصيرة قدر يثبت نجاحه، في كل الأكلات الشرقية، ما بين فتة الحمص اللي تدوخك من حلاوتها والعيش المقرمش جواها، وكفتة الخشخاش اللي تنقلك على لبنان من غير طيارة، أكل مصري ولبناني في مكان واحد وبأسعار حلوة جدًا.
الأكل اليوناني ناس قليلة جدًا اللي بـ يقدموه في القاهرة، لكن سانتوريني بـ ينقلك على اليونان على طول في أقل من ساعة مسافة مشوارك لهناك، ما بين جو المطعم اللي كله بـ يفكرك باليونان بألوانه المبهجة وما بين وصفاته اللذيذة اللي تخلي ريقك يجري من الريحة بس.
دي اختياراتنا ما بين مطاعم كثيرة شاركتنا رحلة تذوق على مدار سنة 2015، نتمنى لهم كلهم التوفيق ونتمنى للمطاعم الثانية أنهم يبقوا أحسن ويستمروا في عطائهم علشان يشاركونا السنة الجاية نجاحهم.
وكل سنة وأنتم طيبين!
