The Definitive Guide to Living in the Capital , Cairo , Egypt

كتير مننا بيحب الحواوشي، خصوصًا في المطاعم، واللي بيكون مختلف من حيث الطعم عن حواوشي البيت، ولو كنت رحت عابدين قبل كده يبقى أكيد سمعت عن حواوشي الرفاعي.. اللي بيعتبر علامة من علامات المنطقة، علشان كده قررنا في كايرو 360 أننا ننقل لكم تجربتنا مع المكان ده.. 

 اللي مايعرفش إيه هو حواوشي الرفاعي،  يبقى فايته كتير الحقيقة، المكان محل جزارة قرر إنه يعمل “حواوشي”، من خلال اللحم البلدي والخلطات الخاصة بيه، والمنيو بتاعه فيه حوواشي سادة وجبنة وسجق وبسطرمة، وضاني، وننصح اللي عاوز يجرب يروح على المغرب لأن قبل الساعة 5 مش هتلاقى غير حواوشي سادة وخضروات وجبنة، لأننا رحنا الساعة 3 وقالوا لنا الطلب أكثر في التوقيت ده على الأصناف دي فبنأجل الباقي.

القعدة في المكان مريحة، والترابيزات بتخليك تحس إنك في مكان بسيط، والموظفين في المكان بيهتموا بكل عميل جوه المطعم. 

طلبنا رغيف حواوشي جبنة، نزل لنا بعد حوالي 25 دقيقة، ودي حاجة ضايقتنا شوية، يمكن علشان كنا جعانين، لكن متفهمين إن المكان زحمة شوية، وكمان التسوية بتاخد وقت، ثمنه 24 جنيه، وكان عبارة عن عجينة عيش فيها طماطم وفلفل أخضر وزيتون و لحمة كندوز وجبنة موتزاريلا، متسوى فى الفرن، وبينزل طازة، بطعم حكاية، بيخليك تاكل من غير ما تحس، وهو سخن، وكمان جربنا من عندهم سلاطة الطحينة اللي كانت مميزة ومظبوطة ودي كان سعرها 3 جنيه.

مسكتناش لأن نفسنا اتفتحت وطلبنا واحد سادة كمان بـ20 جنيه، وهو عبارة عن عيش ولحمة ببهارات مظبوطة جدًا، وكمان فيها نكهة تتبيلة البيت شوية.

هتلاحظ إن المكان فيه ناس من كل المستويات، والكل مستمتع ومركز مع الحواوشي الممتع.

هنزور المكان تاني قريب أكيد، علشان نجرب حواوشي السجق والضاني والبسطرمة. ولحد ما ده يحصل بننصحكم تزوروا المكان.