The Definitive Guide to Living in the Capital , Cairo , Egypt

الأكل المصري لا يعلى عليه في النكهة والخامات والمواصفات، ومن أهم مطاعم الأكل المصري الأصيل في القاهرة “حواوشي الربيع”، واللي عملنا أكتر من ريفيو عنه قبل كده وفاز معانا ضمن جوائز اختيارات المحررين لفرعه الأشهر في إمبابة، ولكن من وقت افتتاح فرع الشيخ زايد واحنا بنفكر نعمل ريفيو عنه وجه الوقت أننا نعمل الريفيو ده بس تفتكروا فيه فرق بين الفرعين؟! ده اللي هنعرفه في السطور الجاية.

خلينا نقول إن فرع حواوشي الربيع الشيخ زايد مساحته مقاربة لفرع إمبابة ولكن الزحمة أكتر، وقائمة الانتظار بتاخد وقت أطول، وعندهم إن دور وأوت دور برضه، والكراسي والتراببيزات في زايد أفخم من إمبابة ومن وجهة نظرنا أن فريق العمل عدده أقل وده له أسبابه، أولًا؛ إحنا علشان نلاقى حد ياخد مننا الأوردر قعدنا 13 دقيقة وكمان بعد ما طلبنا مرتين من مدير المكان حد ياخد الأوردر وهو واقف بشكل سلبي ورده “هييجي حد ياخد الأوردر”، بعكس فرع إمبابة اللي من أول ما تقعد بياخدوا منك الأوردر، وطبق السلطة نزل بعد 10 دقائق من الطلب والأطباق الرئيسية نزلت بعد 19 دقيقة من أخذ الأوردر وده وقت معقول بالنسبة للزحام في المكان.

ندخل بقى على الأكل وجودته لأننا طلبنا منهم سلاطات مشكلة ونزل لنا طبق سلطة فيه “بابا غنوج – طحينة – باذنجان” وكان سعره 60 جنيه، وده سعر مبالغ فيه بالنسبة للكمية، لأننا بربع الثمن ده بناخد سلطات “خضراء – طحينة – باذنجان” لكل فرد في فرع إمبابة وده في الحقيقة صدمنا، وطلبنا طبق ممبار وكان سعره 150 جنيه، وطعمه يخليكم تهيموا في حبه ولكن كميته قليلة نوعًا ما.

وكمان طلبنا طاجن فريك باللحمة وكان سعره 270 جنيه، وكعادة الربيع الطعم المميز والجودة العالية بتسوية فوق الرائعة ونظافة الفريك.

ومعاه طلبنا طاجن ورق عنب إستيك وهو عبارة عن ورق عنب وفيه إستيك لحمة خلانا “نكاد من فرط الجمال نذوب”، وبيدوب في البق كده، وطعم اللحمة ماختلفش عن فرع إمبابة حتى في الشدة بتاعتها لما تتاكل.

تجربتنا كانت مميزة وانبسطنا بالأكل أكتر بكتير من الخدمة الضعيفة ونتمنى إنهم يحسنوا الخدمة وتكون في مستوى فرع إمبابة.

تقدروا تعرفوا أكتر عن حواوشي الربيع من خلال صفحة الفيسبوك من هنا.