The Definitive Guide to Living in the Capital , Cairo , Egypt

مافيش أوضح من كدة؛ «حمام وسمان» متخصص في حمام وسمان، لكن بـ يعمل كمان طواجن خضار وشوية أصناف جانبية ودجاج مشوي. المطعم فاتح من حوالي شهرين في مكان متميز في عمارات السعودية اللي أمام دار الدفاع الجوي في شارع النزهة في مصر الجديدة، حجمه صغير وشكله أنيق من الخارج ومن الداخل وعدد الترابيزات فيه محدودة، وخط الرقعة اللي مكتوب به اسم المحل بـ يحمل دلالات جيدة لأنه بـ يفكرنا مطاعم الحسين والأزهر المتخصصة في الأكلات المصرية اللي الحمام المحشي على رأسها. دخلنا المكان وقابلنا الموظفين فيه بترحاب شديد، لكن لأننا كنا الوحيدين داخل المكان غصب عننا حسينا أن المكان ممكن ما يبقاش بالجودة الكافية لأن الجودة عندنا مرتبطة بإقبال الناس على المحل طبعًا. ومع الهدوء الشديد في المطعم وعدد العاملين المحدود تخيلنا أننا ممكن نعاني في تجربتنا هنا مع مكان لسة فاتح جديد وبـ يجرب نفسه في مطبخ من أصعب المطابخ وهو المطبخ المصري الأصلي.

المنيو فيه أصناف ظريقة ومتنوعة رغم اسم المحل اللي يوحي بغير كدة، يعني فيه شوربة حمام ودجاج بالكريمة ولسان عصفور، بأسعار من 5 لـ 20 جنيه، وأطباق رئيسية من الحمام والسمان المحشي أرز أو فريك، محمر أو مشوي بأسعار من 50 لـ 68 جنيه، وطاجن العكاوي بـ 65 جنيه، وطواجن الخضار باللحم بـ 25 جنيه، وأصناف جانبية من الملوخية  والكشك (15 جنيه) وورق العنب والحواوشي والسمبوسك (20 جنيه) والأرز بالخلطة (6 جنيه) وسلاطات طماطم وبابا غنوج وطحينة (5 جنيه) ومشروبات غازية و شاي وقهوة.

جربنا الحمام المشوي المحشي فريك وماحبيناش نجرب السمان المرة دي لأننا كل لسة قلقانين من مستوى المطبخ والسمان بالذات لازم يتعمل بحرفنة قوي علشان بـ يبقى دسم بزيادة ومحتاج تسوية مش سهلة، فمع الحمام أخذنا دجاج مشوي (50 جنيه) وطبخ أرز بالمكسرات وسلاطات. بعد 10 دقائق نزل عللى ترابيزتنا طبق ملوخية خضراء وطبق ورق عنب كتحية من المحل! ومن هنا بدأت المفاجآت، طعم ماحصلش وقوام خطير للملوخية المعمولة بشوربة الحمام، وورق عنب فيه مزازة حلوة ومستوي كويس، بعدها نزل أجمل أطباق سلاطة من كل الأنواع وكانت مافيهاش غلطة. ابتدينا نغير قعدتنا ونركز أكثر في الأكل ومترقبين أكثر الأطباق الرئيسية اللي لسة هـ نزل بعد ما عرفنا أن الشيف هنا مش بـ يهزر، والبداية مشجعة جدًا.

الحمام المحشي رائع، والفريك مفلفل جواه مش معجن، وتتبيلته ممتازة، صحيح الجز هنا غالي شوية، لكن يستاهل لأنه نظيف ومعمول بمزاج. الدجاج المشوي كمان كان كويس، بس مش بنفس جودة الحمام والملوخية والسلاطات من قبله، لكن نقدر نقول أن وجبتنا هنا كانت ولا أجدع عزومة في بيت جدتنا، وماننكرش دور أطباق الملوخية والمحشي الهدية اللي جابوها لنا لأنها حسستنا أنها وليمة مش وجرد وجبة في مطعم، وسرعة تقديم الأكل كانت معقولة، 25 دقيقة بالكثير كان الأكل كله قدامنا، والخدمة كانت جيدة ومنتبهة بس كنا نفضل أن الويتر يقف بعيد شوية لأنه كان قريب جدًا مننا وإحنا بـ نأكل، اهتمام بزيادة صحيح بس أكل الحمام محتاج براح زي ما حضراتكم عارفين!

مدير المطعم اهتم وسألنا عن رأينا في كل حاجة، وطبعًا واضح من المقال ده قد إيه إحنا معجبين بـ «حمام وسمان» وسبب إعجابنا نابع من المفاجأة السارة لما لاقينا الأكل بالمستوى ده، بالإضافة للنظافة الشديدة للمكان والاعتناء بالتفاصيل حتى بالمزيكا العربية القديمة اللي بـ يشغلوها. بـ نرشح لكم «حمام وسمان» لأكلة مصري معتبرة في مصر الجديدة.