The Definitive Guide to Living in the Capital , Cairo , Egypt

نقدر نقول إن خروجات زمن ما قبل فيروس كورونا المستجد (كوفيد 19) رجعت تاني، لكن بننصحكم دائمًا بالاهتمام بكل الإجراءات الاحترازية في كل الأماكن، لأن الفيروس لسة موجود، وعلشان الخروج والفسح والأكل شيء رئيسي، هنقولكم خلال السطور الجاية على تجربتنا في مطعم “حلاوة وزعتر”، اللي زورناه مؤخرًا علشان ننقلكم انطباعنا عنه.

المكان ديكوراته كلاسيكية، وهو بيطل على كوبري عباس في منطقة المنيل، ومتقسم 3 أركان منهم 2 بيشوفوا النيل بوضوح، وشبابيكه كلها من الزجاج علشان تشوفوا النيل قدامكم بشكل واضح، وفريق العمل في المكان متعاون جدًا، وبيضحكوا بشكل مستمر وبيساعدوكم تختاروا من المنيو الكبير بتاعهم بدون أي زهق، والطلبات بتنزل لكم بسرعة.

بدأنا تجربتنا بأننا طلبنا قهوة تركي بـ25 جنيه، وده علشان لو ماكنتش عجبتنا ماكناش هنطلب أكل، ولكن كانت فعلًا مظبوطة وتظبط الدماغ والبن جودته ممتازة، بعدها بشوية طلبنا فتة موزة ضاني شرقي، بـ197 جنيه، ورغم أن الفتة كانت قليلة من حيث الكمية لكن دسامة الموزة قادرة تشبع فرد مهما كان أكيل، والموزة رغم انها ضاني بس كانت متسوية صح ومافيهاش ريحة الضاني اللي ممكن تضايق اللي بياكلها، ومش هنبالغ لو قلنا انها بتدوب في الفم.

وطلبنا كمان بولو ريكوتا بـ159 جنيه، وهو عبارة عن فراخ مشوية محشية بجبنة ريكوتا وسبانخ، وكان طعمها عظيم، بس محتاجين يزودوا حشو الجبنة والسبانخ شوية لأنهم كانوا قليلين. كمان طلبنا فراخ مسحب بـ96 جنيه، ودي كانت عبارة عن نصف فرخة مخلية مشوية بتنزلكم على شواية صغيرة وطعمها كان مميز وتتبيلتها هادية ومش تقيلة.

ومن ضمن الطلبات اللي كانت في تجربتنا مكس جريل لبناني بـ159 جنيه، وكان فيه “كفته فراخ – كفتة لحمة – شيش طاووق – كباب”، ومانقدرش نقول غير أنها كانت حلوة لكن كفتة اللحمة ماكنتش أحسن حاجة لأن فيها طعم اللية اللي ممكن كتير يحبوها بس إحنا مستطعمنهاش.

واتنقلنا بعد كده للحلو اللي احترنا هنقدر ناكله ولا لأ بعد الأكل الجميل الدسم اللي جربناه ده، فقررنا نجرب مولتن كيك بالآيس كريم بـ75 جنيه، اللي طعمه طلع عظمة، وكمان محتاج 2 يخلصوه لأنه كبير.

عرفنا كمان إن المكان بيقدم وجبات إفطار مميزة، وأكيد هنجربها في مرة تانية ونقولكم رأينا فيها.

تقدروا تعرفوا أكتر عن “حلاوة وزعتر” من خلال صفحة الفيسبوك من هنا.