The Definitive Guide to Living in the Capital , Cairo , Egypt

رنا شرف

رمضان بيحب الأكل البيتي، لإنه بيفكرنا بجو جميل ولمة العيلة، علشان كده بنفرح لما بنوصل لمطعم في القاهرة بيعرف يحسسنا بجو اللمة الحلوة، ويخلينا نرجع لأيام زمان، خصوصًا في شهر رمضان، وده اللي لقيناه في حاتي أحمد ندا، اللي بيعمل أكلات لما جربناها لقيناها شبه أكلات البيت، تعالوا نعرف عنه أكتر.

حاتي أحمد ندا، له كذا فرع في القاهرة، إحنا جربنا منهم الفرع الموجود في عين شمس، والمكان بيعرف نفسه بإنه “وحش الأكل الشرقي في مصر”.

أول ما وصلنا المكان لاحظنا زحمة شديدة، لكن الحلو إنها كانت زحمة منظمة، والجو الرمضاني اللي مسيطر على المكان كان جميل، تحس إنك في خيمة رمضانية، وعجبنا قوي العيش اللي بيتعمل قدامك في جو يحسسك كأنك في في الريف.

كمان المكان بيقدم شو جميل، يعني هتستمتع مع الأكل بعروض تنورة، وتحطيب بالزي الصعيدي، يعني الجو مميز فعلًا ومبهج، وده عجبنا أكتر حتى من الأكل نفسه، والحقيقة إن وجود العائلات والأطفال أعطى للمكان جو عائلي جميل.

نيجي بقي للأكل..           

حاتي أحمد ندا عنده صواني مميزة كتير، زي صينية الشلة، والصحاب، والوحوش، والحقيقة كلها مميزة، فيها مشاوي زي الكفتة وشيش الطاووق، ومقبلات زي السمبوسك وورق العنب وسلطات الطحينة والبابا غنوج والسلاطة الخضرا.

سعر الصواني مش واحد لأنهم مختلفين في الكمية والمكونات، إحنا قولنا نجرب صينية اسمها صينية أحمد ندا، سعرها 510 جنيه، ودي عبارة عن 24 قطعة كفتة وربع ممبار و15 قطعة ورق عنب و12 قطعة شيش طاوق، مع أرز بسمتي و8 طرب، وسلطات طحينة وباباغنوج ومخلل وعيش، الصينية بتكفي أكتر من شخصين، يعني لو عندك عزومة صغيرة هتكفي جدًا، إحنا كنا فاكرين إنها بتكفي فردين بس لكن بصراحة كانت كميتها كبيرة وحلوة.

بشكل عام الأكل أسعدنا، بس كنا نتمنى الشيش طاووق يكون أفضل من كدة، لكن بشكل عام الأكل فعلًا جميل وبيتي.