The Definitive Guide to Living in the Capital , Cairo , Egypt

حاجتين في الدنيا دي كلها مش بتخلي بس لعابك يسيل، لا ده كمان جسمك كله ينهار أول ما تشوفهم: الشوكولاتة السايحة، والجبنة السايحة.

وبالتالي لما لقينا الفيسبوك كله مقلوب علشان بوستات بتتكلم عن مكان اسمه غوستو – Gusto بيقدم لك الباستا جوه قالب الجبنة البارميزان كان لازم نجوع نفسنا ونجهز بطننا علشان ندلعها دلع من العيار التقيل.

موجود في شارع 9 العظيم في المعادي، الشارع ده له مكان في قلبنا وفي قلب تقريبًا القاهريين كلهم، لما وصلنا كان المكان Complete وبالتالي أخدنا دورنا في الـ Waiting list، قعدنا حبة طوال شوية بس اللي صبرنا الـ Welcome Drink الأزرق العجيب اللي قدموه لنا، كان منعش جدًا وطعمه مميز وغريب، لما سألنا على اسمه عرفنا أنه Blue Mint، يوم زيارتنا كان فيه ضغط شديد لدرجة أن لما لقينا ناس مشيت والدور جه علينا انتظرنا فترة عقبال ما جهزوا لنا ترابيزتنا.

المطعم صغير –على عكس توقعاتنا- عبارة عن مدخل مستطيل الشكل والترابيزات والكراسي على الجانبين وأنت داخل، ونفس الشيء جوه في الجزء الـ indoor، وآخر الممر المطبخ والحمامات، قعدنا في الهواء الطلق ونزلت لنا المنيوهات واختارنا شوربة بصل (35 جنيه) ودى كانت توصية الجرسون المبتسم، وطبعًا الهدف اللى جئنا علشانه غوستو باستا (77 جنيه) ودي عبارة عن مكرونة بنا بصوص أبيض وقطع فراخ بتتحط في قالب جبنة بارميجان، وسخونية الصوص بتسيح الجبنة وتدوب معاها وبتقدم مع شرايح عيش محمص وجبنة بارميجان مبشورة، سيحان في الجبنة من الآخر، والفكرة أن كل ده بيتعمل قدامك، يعني الشيف بييجي بترابيزة بعجل وبيعمل الـ Show ده كله أدامك.

اختارنا طبق رئيسي تاني هو بيف بصوص التوت (148 جنيه)، ده حقيقي أنتم قريتوا صح، ولأننا من هواة الأكلات الغريبة كان لازم نجربه، انتظرنا شوية عقبال ما الشوربة جات لنا وبعدها بشوية تانيين جات الأطباق الرئيسية، الشوربة كانت حلوة جدًا، قوامها مضبوط والتوست محمص وعليه جبنة كان طعمهم سوا متجانس والكمية كويسة، ممكن يكون كمية شرايح البصل في الطبق كتيرة شوية بس مش مشكلة بالنسبة لنا.

نيجي بقى على التقيل، غوستو باستا كانت حلوة جدًا والصوص غنى وكريمي، شرايح الفراخ كانت مخدومة كويس وكميتها كتيرة جدًا (الطبق كبير) والـ Show اللى حصل عجبنا والجرسون كان لطيف وقعد يتكلم ويضحك معانا، وتفوق عليه كمان البيف بصوص التوت، الطعم المسكر في التوت عمل تعادل مع تتبيلة البيف اللى الأساس فيها بيكون الفلفل، قطعية اللحمة كمان كانت طعمها حلو جدًا ومستوية كويس Well Done، الصراحة كان ميكس جديد وحلو جدًا، من الآخر نرفع القبعة للى فكر فيه.

ما كناش قادرين نتنفس من كتر الأكل فختمنا زيارتنا بمشروب بينك ليدي (32 جنيه) وده عبارة عن راسبرى وليمون وأناناس، هو Syrup مش فريش وبييجي في Cocktail shaker الجرسون بيرجهم كويس ويقدمهم لك بالتلج، العصير كان منعش جدًا وكان نهاية جميلة لزيارتنا.

اللي عرفناه أن غوستو هيفتحوا فرع جديد في التجمع الخامس قريب فى مول بوينت 90، يا رب يكون حجمه أكبر من المعادى، لأن كان لنا تعليق على العتبة اللى موجودة عند مدخل المطعم اللى بتضطر الجرسون أنه يستعين بزميله علشان يشيلوا سوا ترابيزة الغوستو باستا، ولأن الممر ضيق فبيضطر اللى رايح الحمام أو خارج منه ينتظر علشان يعدي، فالموضوع كان عامل أزمة شوية.

ما ننكرش أننا اتبسطنا في زيارتنا، وأكيد هنروح تانى علشان نجرب الميلك شيك والحلويات اللى شكلها يجنن في الصور على صفحتهم على الفيسبوك.