The Definitive Guide to Living in the Capital , Cairo , Egypt

كل بلد بتكون معروفة بأكلة معينة بتميزها، وبتخلي الناس لما تسافر البلد دي لازم تجربها، نفس الفكرة في المطاعم المتخصصة اللي بتقدم أكلات متخصصة من مطابخ عالمية مقدمة بحرفية عالية، لدرجة أنك تحس أنك سافرت البلد نفسها وجربت الأكل فيها.

تعالوا نتعرف مع بعض على الفائزين في فئة أفضل المطاعم المتخصصة في القاهرة ضمن جوائز اختيارت محرري كايرو 360 لعام 2021:

أوفيو – Ovio

من الأماكن القليلة اللي قدرت تحافظ على جودة كل الأكلات اللي بتقدمها سواء الحلويات الخاصة بيهم أو برطمانات المربة والعسل، أو المكرونة والبيتزا والسلاطات. حالة من الحرفية والشغف مش من الساهل تلاقيها في أي مكان.

 تابلا لونا – Tabla luna

لو أنت من عشاق المطبخ اللاتيني يبقى أكيد هتقع في حب تابلا لونا اللي تفننوا في تقديم الأكلات اللاتينية سواء في الحلو أو الحادق أو حتى المقبلات. تجربة صعب تتنسي وتستاهل أنك تجربها مرة على الأقل في حياتك.

عثمانلي – Osmanly

من الأماكن القليلة في القاهرة اللي هتلاقيها بتقدم أكل تركي ببراعة، مش بس لأنها في فندق النيل كمبنسكي لكن كمان عذوبة وأناقة الأكلات التركية اللي بتقدمها ما تتوصفش، تتعاش بس.

سيكوز – Seecoz:

المكان بيقدم أكلات من المطبخ اليوناني، هتحس فيه كأنك على جزيرة من جزر اليونان فعلًا، وده بسبب اللون الأزرق الطاغي على كل تفاصيل المكان، والهدوء والراحة النفسية اللي بيخلقها الديكور، بألوانه الهادية، وقعدته الرايقة.

فيش شيبس آند دبس – Fish Chips & Dips:

لو كنت بتحب تجربة أكلات ووجبات جديدة ومطرقعة، يبقى لازم تجرب ساندويتش الدويتو الجمبري والفراخ، وبرجر السلمون العجيب في فيش شيبس آند دبس، تجربة مستحيل هتنساها.