The Definitive Guide to Living in the Capital , Cairo , Egypt

في الفترة الأخيرة انتشرت ثقافة مفيدة جدًا وسط الناس تخلي صحتهم أفضل وتخليهم دائمًا يحسوا بالنشاط والحيوية. ثقافة الأكل الصحي اللي لما  انتشرت بشكل كبير في القاهرة وبدأ يكون ليها زبائنها من مختلف الأعمار بدأت تزيد نسبة المحلات اللي بتهتم أنها تقدم لجمهورها أحسن جودة بأقل سعر، علشان كده فريق كايرو 360 أختار  لكم منهم  الأفضل على الإطلاق.

الفائزين في فئة أفضل أماكن الأكل الصحي في جوائز اختيارت محرري كايرو 360 لعام 2017:

إن سيزون – In Season

أجمل عصائر طازة من غير أي مكونات صناعية، وأجمل كوباية فيها زبادي وفاكهة أو بودينج شيا، صحيح الأسعار غالية شوية بس ده مقابل المنتج اللي بيتعمل لك بمنتهى الحرفية والإتقان. كمان هم بيقدموا وجبات صحية سواء توست أو سلاطة خفيفة، ده غير إن كل حاجة بيكون مكتوب نسبة السعرات الحرارية والدهون اللي فيها جنبها في المنيو.

كيه كال – Kcal

 برضه بيكتبوا جنب كل وجبة عدد السعرات الحرارية الخاصة بها ومكوناتها، بس أكتر حاجة بتميز المكان هي الوجبات المختلفة الخفيفة سواء مكرونة أو سلاطة او أكل آسيوي أو ياباني.

جرين هابيتس – Green Habits

لكل عشاق السلاطة الخضراء اللي بجد اللي مكوناتها طازة وحجمها كبير وممكن تضيفوا لها كل اللي تحتاجوه، جرين هابيتس نجح أنه يجذب سكان المعادي في أنهم يكتفوا بأجمل طبق سلاطة من عنده واللي فعلًا بيكون أخضر، ده غير الكوكتيلات الصحية اللي بيعملوها والديتوكس.

بي جوود تو يو – Be Good To You

ممكن أي حد يعمل طبق سلاطة بس مش أي حد ممكن يبدع في أنه يوفر لك نفس مكونات طبق السلاطة في أطباق مختلفة تفتح شهيتك على الرجيم وده اللي بيعمله بي جوود تو يو، فبيوفر أطباق من مطابخ مختلفة معمولة بحب وشغف وإتقان لكل حاجة بتتحط في الطبق.

ليتشي – Lychee

 أحسن عصير طبيعي تشربه وأنت مستمتع بكل النكهات بتاعته هو ليتشي، واللي له فروع في أكتر من مكان دلوقتي. وبرغم أنه فتح من أكثر من سنة إلا أن مستواه لسه زي ما هو مبهر وأنيق.