The Definitive Guide to Living in the Capital , Cairo , Egypt

خبير الأكل المكسيكي جرينجوس بوريتو ماكانش حاضر بقوة في مقالات كايرو360 الأخيرة، ومن أهم المشاكل اللي بتواجه الأكل المكسيكي إنه محتاج يتاكل في المطعم طازة وسخن. جرينجوس في ديسمبر اللي فات فتح فرع فيه أماكن للأكل وكمان عمل منيو جديدة فيها أشكال وألوان من الأطباق المكسيكي، وإحنا بصراحة مانقدرش على كده.

المطعم الصغير نسبيًا فتح في شارع 9 المعادي الزحمة دائمًا وأبدًا بعدد محدود من الكراسي والترابيزات. أول حاجة هتلاحظها هي بار على شكل حرف L عليه ما لذ وطاب من البروتينات والصوصات والإضافات المتنوعة اللي بتخليك تعمل أي ابتكار يخطر على بالك من بوريتو أو تاكو أو حتى سلاطة. بصراحة أجواء جرينجوس مالهاش حل وتحسسك بالسعادة خصوصًا لما تختار مكونات أكلتك بنفسك وتشوفهم بيحضروها قصاد عينك.

قبل ما نختار مكونات البوريتو والتاكو طلبنا تشيلي ناتشو فييستا (53 جنيه) من المقبلات. عيش التورتيلا المقرمش كان مشطشط بفضل الصوص والتشيلي كون كارني بطعمهم الحراق القوي اللي عمل شغل مع صوص queso  والساور كريم وصوص الأفوكادو الكريمي taquiro وجواكامولي. أما البيكو دي جالو فده حكاية لوحدة وأكيد إضافة لذيذة. جايز ناس كتير بتشتكي من طريقة توزيع المكونات دي في النوعيات دي من الأطباق، بس بصراحة العشوائية هي اللي عملت طعم هايل للطبق، وتحس مع كل قطعة تورتيلا إن لها طعم مختلف.

وصلنا لمرحلة “اختار أكلك بنفسك”، والمرحلة دي بتتعمل على أربع خطوات. بصوا هي المنيو بصراحة مربكة شوية، فأحسن حاجة تطلبوا مساعدتهم. أول حاجة هتختاروا بين البوريتو أو burrito bowls أو التاكو أو الأنشيلادا أو السلاطة، وبعدين تختاروا نوعية البروتين، وبعديها تختاروا الإضافات وأخيرًا الصوصات.

إحنا عن نفسنا اخترنا بوريتو (53 جنيه) محشي فراخ مشوية ورز بالكزبرة والليمون وخضروات الفاهيتا وجواكامولي وصوص  quesoوtaquiro. جايز كمية الرز كانت كبيرة بالمقارنة مع باقي الحشو، بس بصراحة كان مستوي كويس وواضح فيه نكهة الكزبرة القوية. خضروات الفاهيتا كانت فلفل ألوان وبصل مشويين، وعملوا طعم لذيذ مع الفراخ المشوية. أما صوص queso فطبعًا لا يعلى عليه، أصل مين فينا مش بيحب الجبنة السايحة؟.

أما التاكو فييستا (52 جنيه) فعبارة عن ثلاث قطع تاكو بتختارهم من التاكو الطري أو المقرمش. التاكو الأولاني كان بصوص سويت أند سبايسي ومحشي فراخ مشوية طرية وصوص أناناس طازة له نكهة قوية لذيذة وصوص سبايسي. اختيارنا التاني كان Carne Asada taco – وهو أكتر حاجة عجبتنا بالمناسبة – عشان نستمتع بالستيك اللذيذ وعليه بصل طازة وكزبرة وصوص taquiro. أخر تاكو كان machaca shredded الغني بنكهته القوية واللي أضفناله كمان صوصات queso وبيكو دي جالو وساور كريم.

قررنا يومها كمان نجرب Burrito Bowl (53 جنيه) ونشوف إيه نظامه. هو ببساطة عبارة عن علبة بلاستيك كبيرة فيها رز مكسيكي وصلصة طماطم قوية، وعليهم ذرة حلوة وفاصوليا حمراء عملت شغل مع التشيلي كون كراني وجبنة شيدر وساور كريم. بصراحة الطبق ده يستحق الإشادة لكميته الكبيرة، ويعتبر اختيار هايل لأكلة حلوة في الشغل.

لو فاكرين إننا شبعنا ومش هنقدر ندخل على الحلو تبقوا غلطانين. أكلتنا المحترمة خلصت بواحد كريم أند فروتس مينيتشانجا (23 جنيه)، وده عبارة عن رول تورتيلا مقلية ومحشية مانجو وكريمة، وبعدين بيترش عليه صوص كركديه بيعمل طعم خرافي للأكلة. إحنا طبعًا عارفين إن محدش يقدر يقاوم طبق النوتيلا إمبانادا، بس الطبق ده فعلًا يستحق التجربة.

قطر جرينجوس وصل بينا لأخر محطة بعد رحلة ولا أروع. انبهارنا طبعًا سببه الأول إنهم نفس المكان اللي بيوصل للبيوت تاكو مكسرة وعيش تورتيلا مزيت بس قدروا يعملوا تاكو وبوريتو ملهمش مثيل وفضلنا نفتكرهم لفترة طويلة بعد زيارتنا.