The Definitive Guide to Living in the Capital , Cairo , Egypt

يوم زيارتنا لمطعم «جوليوز – Golio’s» اللي في ميدان
الجمهورية بالمهندسين لفت نظرنا مكان مكتوب عليه «جافا لافا – Java
Lava» وعرفنا
من العلامة بتاعته أنه “كوفي هاوس”، المكان كان مغري واسمه جذاب وقررنا
أننا في يوم خارجين نروحه.

وده حصل بالفعل.. رحنا المكان وإحنا عندنا حب استطلاع فظيع
أننا نكتشفه من جوه، وكانت المفاجأة.. أول ما دخلنا المكان انبهرنا، الديكور رائع
جدًا والمكان واسع وفيه دوائر كبيرة في الحوائط بعضها مفرغ وبعضها زجاج بـ يبص على
الزرع اللي بره، تحس للحظة أنك قاعد داخل غواصة كبيرة في قاع البحار لولا أن الزرع
اللي بره بـ يغير لك الإحساس ده، فيه شاشات في كل حتة مشغلة قناة MBC
2، ما
قطعش انبهارنا ده إلا صوت الجرسونات بـ يسألونا عاوزين نقعد فى منطقة المدخنين ولا
غير المدخنين.

عرفنا من مديرة المكان أن المطعم
افتتح بقاله 3 شهور فقط وعرفنا أن ده كان مكان مطعم مطعم «ستيك أوت – Steak Out» اللي غير مكانه ونقل في مكان
قريب من “جافا لافا” في نفس المنطقة، لكن علقنا أن المكان من بره مكتوب
عليه أنه كافيه على الرغم من أن المنيو بـ يقدم أكل مطاعم، وقالت لنا أن ده هـ
يتغير قريب على اللافتة اللي بره، ده غير أن المكان فيه إنترنت Wi-Fi لكن كان فيه عطل وقت زيارتنا.

الديكور رائع بـ يغلب عليه اللون
الأحمر في الكنب والبيج في الحوائط، توزيع القعدة حلو قوي ومشغلين مزيكا Chill out هائلة مع ضوء خافت شوية مع رائحة
بخور جميلة جدًا، لاحظنا الإدارة الجيدة لمديرة المطعم، كمان الجرسونات محترفين
جدًا شكلهم فاهمين يعني إيه خدمة جيدة ومحترفة في مطاعم وقمة في الأدب والذوق
لأنهم حتى بـ يبادروا يساعدونا من غير ما نطلب!

باختصار كل الطلبات اللي طلبناها
ما تتخيرش عن بعض في كفاءة الطهي أو التقديم، طلبنا في البداية طبق فيه نوعين لحم
مشوي وكل واحد له صوص منفصل (اختارنا صوص الليمون والميكسد تشيز) (79.99 جنيه)
وكان طعمه أكثر من رائع والصوص بـ ييجي منفصل وطبعًا مع اختيارين لك للأطباق
الجانبية اللي كانوا خضار سوتيه وبطاطس بيوريه، وكمان جربنا هيكوري سموكد تشيكن (44.99
جنيه) اللي كان طعمه برضه مش طبيعي، على الرغم من أننا جربنا الأطباق دي في أماكن
مشابهة كثيرة إلا أنهم أعدوه بمذاق مختلف تمامًا هـ تحسه وأنت هناك، واضح أن الشيف
اهتم بالتفاصيل بزيادة.

بعد شوية طلبت معانا تحلية فجربنا
التشوكولت لافر (19.99 جنيه) وكانت هائلة لكن أحلى حاجة فيه أن الكيك اللي معاها
سكرها مش كثير وبـ ينزل لك 3 أنواع بولة آيس كريم، المزيج بينها وبين صوص
الشوكولاتة عليها كان رائع.

المشروبات هناك ما تقلش حلاوة عن
الأكل، ذقنا عصير ليمون بالنعناع فريش (12.99 جنيه) وكانت قوامه غليظ وسكره مضبوط
وتقديمه حلو جدًا وفيه ابتكار، كمان الكراميل موكا فرابيه (19.99 جنيه) كان غني
وطعمه حلو جدًا.

قبل ما نمشي شكرنا مديرة المكان
على الاستقبال والضيافة الممتازة لأننا كنا مبسوطين جدًا ووعدناها بزيارة المكان
ثاني خاصة أنه لسه في بدايته والمكان ما كانش مزدحم قوي وقت زيارتنا، لكن إحنا
متأكدين أنه هـ يزدحم خلال الشهرين الجايين لأن الحاجة الحلوة بـ تتكلم عن نفسها،
والمكان ده قال كلام حلو كثير قوي.