The Definitive Guide to Living in the Capital , Cairo , Egypt

إحنا شخصيًا كمحررين كايرو 360 بننبسط جدًا لما بنلاقي مكان كتبنا عنه قبل كده أنه حلو ويفضل محافظ على مستواه، وده اللي حصل لنا في زيارتنا لتيدز –Ted’s . كنا كتبنا عن المكان قبل كده في 2014، وتجربتنا كانت لطيفة جدًا، المكان في الدور الرابع في سيتي ستارز، الكراسي ملونة والمكان مقسوم قسمين، قسم للمدخنين ولغير المدخنيين، ودي تعتبر ميزة كبيرة بالنسبة لنا مش دائمًا بنلاقيها في كل مطاعم القاهرة للأسف.

المنيو أغلبه إيطالي ما بين أنواع البيتزا اللي مشهور بيها المكان بعجينتها الإيطالية الرفيعة اللي مالهاش زي، وأنواع المكرونات بس برضه فيه ساندويتشات برجر وأطباق عادية، وأكيد الحلويات اللذيذة اللي كل مرة بتعجبنا أكثر من المرة اللي قبلها.

طلبنا بيتزا بريزولا – Bresaola (101 جنيه) وبدلنا البيزولا بالدجاج لأن خليط الجبن هنا كان عاجبنا أكثر (12 جنيه)، وطلبنا Grilled chicken brochette (84 جنيه)، ومن قائمة المشروبات طلبنا سموزي بطيخ بالنعناع (34 جنيه)، وRed Passion (34 جنيه).

أول حاجة بتنزل لنا هي مقبلات تيدز اللذيذة، واللي عبارة عن جبنة بالطماطم بالتوابل ومعاها عيش وباتون سلايه وزيتون، وبعد حوالي ربع ساعة وصلت البيتزا اللي كانت سخنة ومقرمشة ومغرية لأقصى درجة، البيتزا كان عليها 3 أنواع جبن مختلفة وجرجير بيخفف من حدة الجبنة وطماطم شيري مجففة، عارفين الخلطة الناجحة اللي تخليك نفسك الطبق ده ما يخلصش أبدًا، ده حالنا مع كل أطباق تيدز بس بالذات مع البيتزا. بعد كده وصل الدجاج البروشيت، ودي عبارة عن قطع دجاج شيش طاووق معمولة بالزبادي والليمون وروز ماري والطماطم ومعاها 2 side dishes رز أو بطاطس أو خضار، فاختارنا بطاطس محمرة وبطاطس ويدجز، الدجاج كان سخن ومتبل حلو قوي بس بالنسبة لنا كان ناقصه حبة ليمون زيادة ويا سلام لو شوية دبس رمان، الطعم كان ناقص شوية برغم أنها كانت مستوية تمام وعصارية.

ما نقدرش نروح هناك وما نطلبش حلو، لأننا الحقيقة ضعاف جدًا قدامه، طلبنا lemon mouse jar (23 جنيه)، وchocolate chip cookies (45 جنيه). وطبعًا كان لازم نشرب حاجة تانية مع الأكل علشان نعرف نستمر، فطلبنا موهيتو بالنعناع (34 جنيه). لازم نعترف في البداية أن إحنا وقعنا في حب الـ Lemon mousse jar قبل كده، لدرجة أننا خدنا منها تاني في البيت، هي عبارة عن حاجة حلوة وخفيفة وماتكتفيش منها أبدًا، سمفونية عشق بين الكريمة اللي بالليمون والكريمة بالمارشميلو المحروق اللي على الوش والبسكويت المطحون مع رشة سكر في الطبقتين. كل معلقة بتحكي شوقها للمعلقة اللي بعدها. أما الـ وchocolate chip cookies فكانت حلوة برضه وخفيفة مقدمة سخنة في طاسة صغيرة مع بولة آيس كريم عليها صوص كارميل، وبرضه طعمها كان حلو جدًا. المهيتو ده بقى إدمان للي بيحبه زينا مبدأيًا هو حجم الكوباية أكبر أو بمعنى أصح البرطمان، فيه سفن آب ونعناع وليمون مع ثلج مجروش، بس هو مش أي حد بيعرف يوصل لتوازن النكهات اللي كان فيه، مايتشبعش منه فعلًا.

تجربتنا النهارده كانت مبهجة جدًا، لأن مافيش حاجة ماعجبتناش، نتمنى أنهم يفضلوا دائمًا في تقدم، علشان نفضل نروح لهم على طول ونستسلم.