The Definitive Guide to Living in the Capital , Cairo , Egypt

بعد نجاحه في 3 مناطق في القاهرة، توسع تشيكن فيلا – Chicken Fil-A وفتح كمان في فاميلى مول في منطقة 6 أكتوبر، في رأينا أصيع حاجة في تشيكن فيلا هو أسلوب الدعايا الجامد اللي عاملينه على صفحتهم على الفيسبوك، فيه بوستات بتضحك ومبتكرة ده غير أن صور الأكل تجرى ريق اللي مش جعان.

طيب ييجوا لحد عندنا وما نروحش؟ دي تبقى عيبة حتى! المطعم موجود في فاميلي مول في منطقة الطعام المفتوحة بره، هتشوفها على طول وأنت بتركن عربيتك في الجراج المفتوح أو وأنت داخل من الباب الرئيسي، على عكس أماكن تانية نظامها أنك تروح عند الكاشير وتطلب الأوردر وتنتظر على ترابيزتك، هنا فيه خلية نحل بتيجي لحد عندك وتشوف طلبك وبتساعدك كمان في الاختيار.

المنيو عبارة عن قسم ساندويتشات فراخ مقلية أو برجر محشية جبنة، أو مش محشية جبنة (سادة)، وقسم البطاطس اللي فيه منها أنواع كتيرة جدًا زي الويدجز واللي بصوص جبنة أو تشيلى أو وافل، وقسم طلبات جانبية زي الموتزاريلا ستيكس وحلقات البصل أو صوصات زيادة، وفيه وجبات للأطفال وحلو ومشروبات غازية، اللي كان غريب بس في المنيو أنهم كانوا حاطين صور ديناصورات والدعايا بتركز على أن الساندويتشات ضخمة زي حجم الفيل مش الديناصور!

الساندويتشات ما بينزلش معاها بطاطس ومشروب زي باقي الأماكن وبالتالى لك مطلق الحرية في الاختيار، ممكن تقلب طلبك كومبو (بطاطس ومشروب بـ 20.90 جنيه)، طلبنا مكسيكان فيلا (65.90 جنيه) وده عبارة عن قطع فراخ مقلية محشية بالجبنة وصوص السبايسي مايو عليهم قطع الفلفل الألوان ومتغرقين بصوص الجبنة وقطع الدوريتوس، واختارنا كمان بيج بانج (45.90 جنيه) عبارة عن قطع فراخ مقلية غرقانة في صوص الجبنة السايحة على البطاطس المقلية عليهم حلقات البصل وفلفل الهالوبينو وصوص سبايسي، زودنا كمان على الطلب بطاطس ويدجز (18.90 جنيه) ومشروب غازي (10.99 جنيه).

الأكل أخذ وقت معقول في التحضير، الجرسون اللي كان معانا اقترح أنه يحط الهالوبينو والصوص السبايسي بره علشان نزود بالكمية اللي محتاجينها وكانت نصيحة في الجون الصراحة لأن الصوص كان مشطشط جدًا، بالنسبة لنا المكسيكان فيلا كان الأفضل لأن إضافة قطع الدوريتوس المقرمشة كانت عاملة ميكس مع طراوة البرجر، وإحنا بنحب الأكلات اللي بيبقى فيها احتفال في بقك لما تاكل، الصوصات كانت رائعة وكل مكون محطوط بتوازن مع التاني.. بطننا كانت سعيدة!

البيج بانج برضه كان مكوناته وطعمه لوحة فنية، حلقات البصل والبطاطس المقلية مع البرجر كانوا عاملين ميكس حلو، أي نعم كلها حاجات مقلية بس كان Guilty Pleasure مش بنكرره كتير، وأنت بتاكل الساندويتشات محتاج تفتح بقك على المنجلة من كتر المكونات لكن في النهاية هتتبسط، البطاطس الويدجز كمان كانت حلوة جدًا ومليانة لحم ومش مزيتة.

ما كناش قادرين نتنفس لكن عيوننا كانت على قسم الحلو كان لازم نجربه، أغلب الحاجات اللي في قسم الحلو أصناف مقلية وعليها صوص شوكولاتة أو كراميل فقررنا أننا نطلبه تيك أواي علشان ناكله لما بطننا تهدأ شوية، أخدنا صوابع بطاطا مقلية عليها قرفة وصوص شوكولاتة وأوريو (30 جنيه) وممكن تغير الصوص يبقى كراميل مع بسكويت، لما ذوقنا البطاطا بعد فترة كانت حلوة جدًا بس كانت تقيلة موت، ده غير أن الأوريو كان مستخبي تحت البطاطا فما استمتعناش بمزج طعمه مع باقي المكونات، الحلو ده تروح تاكله لوحده وممكن تقسمه كمان مع صديق لك.

تجربتنا في تشيكن فيلا كانت ممتعة جدًا، فرحت بُقنا وبطننا بس هتخلينا نلعب رياضة أسبوع بحاله علشان نحرق كل اللي أكلناه ده، بس مافيش مانع أننا نروح من وقت للتاني علشان نتبسط!