The Definitive Guide to Living in the Capital , Cairo , Egypt

الأكل المصري من الأكلات المميزة على مستوى العالم، وفيه حالة عشق بين المصريين وبين أكلهم، وكمان الزوار العرب والأجانب بيحبوه. من أهم مميزاته جودته وتسبيكته، وعلشان كده قررنا نخوض تجربة مختلفة في قرية بدوية للمشويات، وجربنا منهم مجموعة أكلات مميزة، وهنحكي لكم عن تجربتنا في السطور الجاية.

أول حاجة المكان واسع جدًا، ومناسب لو هتروح مع العيلة، الأصحاب، أو حتى لعزومة شغل. الكراسي والترابيزات مساحتها كويسة ومريحة، وعندهم كمان كراسي أنتريه لراحة أكتر، والطاقم هناك ودود جدًا وخدمتهم سريعة ومهذبة.

بدأنا التجربة مع سلطة خضراء سعرها 28 جنيه، وبابا غنوج بنفس السعر. الطعم مصري أصيل، لكن الكمية كانت قليلة شوية. بعد كده جربنا محشي ورق عنب بسعر 99 جنيه، وكان طازة ومستوي كويس، بس الطعم كان مِسكر حبتين.

بعدها قررنا نطلب فتة لحم محمر بـ245 جنيه، والتتبيلة كانت تحفة جدًا، والأرز أبيض ومظبوط، وقطع اللحمة مستوية ومتحمرة زي ما بنحب، لكن العيش كان قليل جدًا، وإحنا بصراحة بنحب الفتة بعيش أكتر.

كمان جربنا فتة الفراخ المشوية بـ205 جنيه، ونفس طعم الفتة الحلو، بس نفس مشكلة قلة العيش. الفراخ كانت متبلة كويس ومشوية صح، لكن نتمنى أنهم يعملوا فراخ مخلية علشان تبقى أسهل في الأكل.

بشكل عام، تجربتنا كانت حلوة جدًا، وبنرشح لكم المكان في أي وقت، خاصة لو بتفكروا تفطروا بره خلال رمضان. من الأماكن اللي تستحق تكون ضمن قائمة زياراتكم.

تقدروا تعرفوا أكتر عنهم من خلال صفحة الفيسبوك من هنا.