The Definitive Guide to Living in the Capital , Cairo , Egypt

قولنا الكلام ده وهنفضل نقوله: لفينا كثير السنين اللي فاتوا على مطعم بيقدم أكل إيطالي بجد والموضوع كان فعلًا صعب. الأكل الإيطالي الأصلي يا جماعة لا يعلى عليه، بس المشكلة أنه محتاج وقت طويل للتحضيرومكونات الأكل تكون كلها طازة. الفكرة هنا إن في مطاعم تتعد على الصوابع رفضت تمشي مع التيار وبتقدم أكل إيطالي بجد، ومنهم "بيلا- Bella".

خلونا الأول نتكلم عن أجواء بيلا الموجود في فور سيزونز نايل بلازا ونقول إنها طبعًا فخمة وده متوقع من أي مطعم موجود في فندق كبير، ومع المدخل المعمول بالخشب والرخام والإطلالة الخرافية على النيل والخدمة المميزة أكيد كنا داخلين على تجربة فريدة من نوعها.

وإحنا بنختار أكلنا، رحبوا بينا ببيتزا عجينتها رفيعة عليها صلصة خفيفة وجبنة موتزاريلا. بعدها وصل الجرسون ومعاه أنواع مختلفة من عيش طلياني حكاية، وأحسن حاجة فيهم كان عيش بالهوت دوج اللي عليه صلصة طماطم وفلفل أخضر عملوا شغل عالي.

الاستقبال الملوكي كان أحلى بداية ليومنا في بيلّا، وبعدها بدأنا الحكاية مع كابريس سالاد (125 جنيه) لفتح شهيتنا. الموضوع ببساطة عبارة عن شرائح طماطم وريحان طازة وكرات موتزاريلا محشية صوص بافالو وبيستو، وكل ده مرشوش عليه زيت زيتون وشوية بيستو كمان لزوم الطعم القوي، وبصراحة كل المكونات كانت طازة وجودتها عالية؛ وهي الأكلة الحلوة إيه غير شوية مكونات حلوة فوق بعض!

نروح بعد كده على الكلام الكبير ونبدأ مع "طبق اليوم" (400 جنيه) اللي كان يومها ستيك ريب آي مع مشروم ريزوتو. الستيك المستوي "medium" كان من عالم تاني، وبيتقدم معاه مرقة حلوة عبارة عن صويا صوص وثوم مع الشحم المتساقط من الستيك – يا حلاوة! المشروم ريزوتو كمان كان هايل ويتميز بقوامه المتماسك وكمية كبيرة من المشروم الطازة مع رشة زيت تروفل، والتركيبة دي غيرت من مفهوم الريزوتو ونقلته لمستوى جديد.

جربنا كمان سالمون فيليه (280 جنيه) وكان اختيار في محله.الطبق بيتقدم معاه شرائح بطاطس مشوية وسبانخ سوتيه بالثوم؛ السالمون المشوي الطري نفسه كان حكاية – وعليه علامات الشوي اللي تفتح النفس –وطعمه كان هايل والفضل يرجع للخل البلسمي. الطبق ده أكبر مثال على اجتماع البساطة مع الفخامة.

وصلنا للكتالانا (80 جنيه) وهو طبق حلويات أسباني قريب من الكريم بروليه وله شعبية كبيرة جدًا في إيطاليا، فمن فضلك اوعى تستغرب لما تشوفه في أي مطعم إيطالي. الطبق كان عبارة عن كاس مليان كسترد سكره مضبوط وقوامه ثقيل شوية، وعليه مكعبات كمثرى بالقرفة وقطع بلح. يمكن الاختلاف في الكتالانا هو جزئية "البروليه"، لكن على أي حال طعمه كان روعة.

نقدر نقول إن تجربتنا مع بيلّا كانت شبه متكاملة. يعني من الخدمة ممتازة للأجواء فخمة والأكل الإيطالي اللي بجد، الموضوع فعلًا كان هايل، بس طبعًا كل حاجة ولها ثمنها.