The Definitive Guide to Living in the Capital , Cairo , Egypt

بدأوا بمطعم “كارلوس – Carlo’s” اللى كان لنا السبق فى الكتابة عن فرعه الجديد.. وتلاها باقى المطاعم التابعة لمركب “لو باشا 1901“.. سلسلة مطاعم المركب الشهير الموجودة فى الزمالك تقدر تلاقيها دلوقت فى أركان مول بالشيخ زايد وعلى رأسها المطعم الإيطالى “بيكولو موندو – Piccolo Mondo” اللى زرناه المرة دي.

سلسلة مطاعم “لو باشا 1901” تشمل: «بيكولو موندو»، و«لو ستيك»، و«أون توب»، و«لو طربوش»، و«ريفر بوت» وغيرها، هـ تلاقيها فى نهاية ممر أركان مول على اليمين ومدخلها من خلف مطعم «كارلوس»، هـ يستقبلك رجل أنيق اللى هـ يرشدك لمدخل المكان اللى حابب تروحه منهم.

«بيكولو موندو» بـ يقدم أطباق إيطالية والبيتزا إلى جانب إمكانية تحضير أطباق ستيك ممكن تختارها من منيو «كارلوس»، بس إحنا ما فهمناش الهدف أو سبب الاستعانة بمنيو مطعم ثاني إلا لو كان بهدف الترويج لأن منيو بيكولو كان بالفعل فيه أطباق ستيك!

المكان واخد الطابع الإيطالي “من بلاده” حتى المزيكا اللى شغالة إيطالية أصيلة دخلتنا فى الموود، وقت زيارتنا ما كانش فيه غيرنا وبالتالى كان فيه اهتمام زيادة بنا، لكن من الواضح أن ده الطبيعي للجرسونات هناك اللى كانوا محترفين جدًا وفى قمة الاحترام، المكان غالب عليه الترابيزات بالكراسي ماعدا كنبة فى الواجهة وراءها زجاج بـ يطل على مدخل “كارلوس” وده اللى قعدنا فيه وكان استراتيجي جدًا لأننا كنا شايفين View كامل للمكان.

المنيو حجمها ضخم ومتنوعة، وفيه شرح لمكونات كل طبق واسمه بالإيطالى وبالعربي، نزل لنا زجاجة مياه صغيرة (8.50 جنيه) بناءً على طلبنا، طلبنا فيليه جورجونزولا (108.90 جنيه) بصوص البلو تشيز، وسكالوبيني ليمون (شرائح بيف بصوص الزبدة والليمون) (99.90 جنيه)، الأطباق بـ ينزل معاها أرز وخضار سوتيه أو بطاطس وخضار سوتيه، مع شوربة خضروات (24.90 جنيه) اللى نزلت لنا أول حاجة مع سبت عظيم من المخبوزات والمقرمشات معاها زبدة وسلاطتين زيتون مفروم أخضر وأسود كانت حلوة جدًا، والمخبوزات كانت فريش وشكلها حلو جدًا، بالنسبة للشوربة كانت كميتها كبيرة والخضار فيها طازج وكثير، كانت حلوة جدًا واستمتعنا بها لحد ما جاء لنا الكلام الكبير.

البيف جورجونزولا كان رائع، البيف كان Well done والصوص اللى عليه كان خرافة، ما كناش عاوزينه يخلص وكنا بـ نحطه على كل حاجة بـ نأكلها زي البطاطس الشيبس أو الخضار، البطاطس كانت معمولة دوائر زي الشيبس لكن سميكة عنها شوية بكميات كبيرة، والخضار كان مستوي كويس بكميات قليلة عبارة عن جزرتين وكوسة وحبة Corn صغيرة وخرشوفة! أحبطنا من كمية الخضار الصغيرة ولأنها كانت حلوة كان نفسنا تكون أكثر شوية وده اللي بلغناه للجرسون، شارئح البيف مع صوص الزبدة والليمون كان وهمي، التسوية ممتازة، الصوص لا يقل حلاوة عن الأول، وبرضه كنا مش عاوزينه يخلص من حلاوته وقوامه المضبوط.

من الحلويات اختارنا فوندو الشوكولاتة (28.90 جنيه) اللى لما جاء لنا ما صدقناش التميز اللى فيه، كيكة هرمية الشكل، رقيقة الطبقة داخلها بركان شوكولاتة منتظر لحظة الانفجار، وبجانبها طبق معمول من البسكويت جواه بولة آيس كريم فانيليا وعليها صوص للتزيين وعلى الطبق كمان، بجد ممتع للعين قبل البطن، ومن لحظة ما أخذنا أول قطمة لحد ما خلصناها الشوكولاتة ما بطلتش سيحان من عمق الكيك.. بجد امتياز.

فيه منيو كمان للمشروبات بـ تتنوع بين الباردة والساخنة وكمان الفريش، لكن مافيش حاجة واخدة طابع إيطالي، المطعم بـ يضيف للحساب كوفر (3 جنيه)، و12% خدمة، و10% ضريبة، استمتعنا بالأطباق جدًا وبازيارة والخدمة لكن الأسعار فى النهاية صدمتنا لأنها غالية شويتين، بس الغالى ثمنه فيه، وهـ تدفع مبلغ وأنت مبسوط وراضي مش وأنت متضرر أن التجربة لا تستحقها.