The Definitive Guide to Living in the Capital , Cairo , Egypt

هوية المكان من أهم العناصر المميزة لأي مطعم، وخصوصًا إنها بترسم صورة المكان في مخيلة الناس، لكن طبعًا الأهم من كده هي المنيو. “بيف بانكر-Beef Bunker” فتحوا أول فروعهم في بوينت 90 القاهرة الجديدة، ومن هنا قرروا يخاطبوا عشاق اللحمة في كل مكان ويعزموهم على أكلة تفتح النفس.

أول حاجة لاحظناها إن بيف بانكر عاملين أثاث المكان بستايلات مختلفة، يعني في مكان فيه كنب كبير، وباقي المكان فيه ترابيزات وكراسي. العلامة التجارية للمكان كمان منتشرة في كل حتة من أرقام الترابيزات للملاحات والأطباق السوداء.

وصلت المنيوهات على شكل لوح خشب وورق المنيو عليه. قررنا نبتدي مع المقبلات واخترنا بيف كارباتشيوBeef Carpaccio  ثمنه (82 جنيه) مع بيكون ماك أند تشيز بولز Bacon Mac N Cheese Balls ثمنه (65 جنيه)، والأثنين وصلوا بعد عشر دقائق.

البيف بيكون معاه طماطم شيري وجرجير وشرائح جبنة بارميزان. مافيش شك إن جمال الأكلة دي بيكون سببها الرئيسي طعم اللحمة، بس المشكلة إن مافيش فيها أي طعم. أما الجرجير فكان طازة والبارميزان أضافت طعم مملح للأكل.

الماك أند تشيز بولز كانت أحلى بكتير. الطبق ببساطة عبارة عن أربع كرات مكرونة بالجبنة مقرمشين على صوص مارينارا وعليهم جبنة شيدر. طعم الجبنة الجميل كان ظاهر وعمل شغل عالي مع صوص المارينارا.

عشر دقائق كمان ووصلت الأطباق الرئيسية وهي فيلي برجر Philly Burger ثمنه (105 جنيه) وجوسي بروسي Juicy Brucey ثمنه (94 جنيه) وبعد شوية وصل طبق بيف ستروجانوف (165 جنيه).

نبتدي مع الفيلي برجر اللي بيتعمل في عيش بسمسم وعليه جبنة وشرائح ستيك صغيرة وبصل وشرائح فلفل أخضر وفوقه خيار مخلل وفي النص خلة أسنان. البرجر نفسه كان مستوي زيادة عن اللزوم وبالتالي كان ناشف جدًا، وماحسيناش بوجود شرائح الستيك.

أما الجوسي بروسي فالمفروض إنه قطعة برجر 200 جرام محشية جبنة، بس اللي وصل فعلًا كان قطعتين برجر وبينهم شريحة جبنة مع بصل وطماطم وخس وبرضه الخيار المخلل والخلة. الغريب إن قطعتين البرجر كانوا أنشف من الساندويتش اللي فات وتحس إنهم محروقين شوية. أي برجر هناك بينزل معاه شوية بطاطس قليلين ومافيش عليهم أي بهارات خالص.

البيف ستروجانوف وصل وعليه فلفل أخضر وبصل ومشروم مع رز بسمتي أبيض. الطبق في الحقيقة مش بيقدم أي جديد، ويمكن الرز كان كويس بس محتاج شوية بهارات. أما اللحمة نفسها فكانت هايلة ولها طعم كريمة غني عمل تناغم يفتح النفس مع طعم اللحمة نفسها.

المشكلة الرئيسية في كل الأطباق الرئيسية كانت كمية الأكل. البرجر كان صغير جدًا والبطاطس قليلة جدًا جدًا والستروجانوف يعتبر صغير بالمقارنة مع سعره.

بعيدًا عن الأكل، في مشاكل تانية قابلتنا يوم زيارتنا لبيف بانكر؛ يعني لما نسألهم على حاجة بيكونوا مش متأكدين من الإجابة، لدرجة إن واحد من الجرسونات كان مش عارف الفرق بين الساندويتش والبرجر. الغريب مكان إن المنيو فيها أكل مالهوش علاقة بمطعم مشويات زي البيتزا والباستا. المهم إن في الأخر أكتر حاجة غريبة بالنسبة لنا كانت الفرق الكبير بين الأسعار وكمية الأكل، وبصراحة مشينا وإحنا متضايقين من جودة الأكل وكمان كنا لسه جعانين.