The Definitive Guide to Living in the Capital , Cairo , Egypt

من
أكثر المطاعم المنتشرة في القاهرة المطاعم اللبنانية، وده بسبب الإقبال على الأكل
اللبناني بشكل عام. لكن قليل من المطاعم اللي بـ يخرج عن الشكل المعتاد للساندويتشات
والأطباق اللي بـ تُقدم في أي مكان بـ يعتبر نفسه “لبناني”. و«بيسترو
زيتونة اللبناني – Zeitouna Lebanese Bistro » واحد من المطاعم اللي هـ تحس أول ما تمسك المنيو أنهم مبتكرين
وبـ يعملوا حاجة مختلفة من غير ما يخرجوا من الإطار العام للمطبخ اللبناني
المحبوب.

بمجرد
ما قعدنا نزل لنا طبق زيتون وعيش محمص كمجاملة من المحل وفتح نفسنا جدًا. وبدأنا
وجبتنا بطبق الجبنة الحلوم المشوية (21 جنيه) والمقانق أو السجق اللبناني بالزبدة
والليمون (35 جنيه). 4 قطع حلوم طعمهم رائع وقوامهم ما كانش مطاط زي المعتاد في
أماكن ثانية وعليها قطرات زيت زيتون وفلفل أسمر. المقانق شبه السجق الشرقي قوي وبـ
تتقدم في صوص طماطم وشكل الطبق كان خطير بالقطع الصغيرة اللي فيه الناعمة جدًا ولها
مذاق ليمون مش شبه أي حاجة ثانية.

مع
الوجبة بتاعتنا طلبنا شاي مثلج بالخوخ (13 جنيه) وليمونادة لبناني ظريفة اسمها في
المنيو عصير ليمون ونعناع. وطعمها شبه كثير عصير الليمون البيتي التقليدي، مع ورقة
النعناع وماء المورد خلت الطعم حلو ومبتكر.

في
الأطباق الرئيسية طلبنا طبق ميكس جريل (67 جنيه) وطبق كفتة أورفليه (54 جنيه) ودي
بـ تبقى مخلوطة بالفلفل الحار والثوم. أطباق المشويات كلها بـ تُقدم مع البطاطس
المحمرة والأرز أو البطاطس المشوية أو كمية قليلة من الفتوش.

كفتة
الأورفليه خفيفة وغير أي كفتة ثانية، والكمية اللي في الطبق كانت كبيرة لكن
التوابل والفلفل الحار ما كانش كثير زي ما طلبنا من الجرسون. المكس جريل مكون من
قطع شيش طاووق وكباب وكفتة. قطع الدجاج واللحمة كانت فريش ومتبلة كويس. والطبقين
الرئيسيين كان مُقدم معاهم قطع من عيدان الذرة المسلوقة، ونصفين من الطماطم
والفلفل المشوي وطبق حمص صغير.

الفتوش
والبطاطس المشوية كان اختيارنا من الأطباق الجانبية وكان اختيار موفق خاصة مع زبدة
الأعشاب اللي نزلت معاهم. كل المكونات طعمها كان طازج جدًا وده كان واضح كمان في
الصوصات والدريسنج، حتى الرمان اللي كان مضاف لتجميل الأطباق عمل طعم رائع للأكل
وكان واضح قد إيه هو فريش.

بـ 23
جنيه ممكن تجيب 3 بولات آيس كريم وتختار من أنواع زي الليمون المثلج والحلاوة وأم
علي (أيوه دي مذاقات آيس كريم عند زيتونة) وطبعًا إحنا بـ نحب الليمون لكن كان
لازم نجرب الحلاوة وأم علي. الأولى كان طعمها حلاوة قوي (غريبة مش كده؟) والثانية
كان طعمها جوز هند أكثر من أي حاجة ثانية لكن الزبيب والفستق عمل طعم هائل للآيس
كريم كله.

اللي بـ
يعمله «بيسترو زيتونة اللبناني – Zeitouna Lebanese Bistro» ببساطة أحسن من أي مكان ثاني وهو أنه قادر يجمع بين خصائص
المطاعم الراقية الغالية الشيك قوي وخصائص المطاعم البسيطة والمأكولات السريعة
اللي بـ تحس فيها براحة أكثر. الجو العام مريح والعاملين مهذبين ومتعاونين والمنيو
متنوع كفاية علشان ترجع للمطعم مرات كثير.