The Definitive Guide to Living in the Capital , Cairo , Egypt

عدى وقت طويل من أخر زيارة لينا لخبير الأكل التايلاندي “بيرد كيدج-Birdcage”. المطعم الموجود في فندق إنتركونتيننتال سميراميس في جاردن سيتي محافظ على أجواءه الراقية والخدمة الرائعة.

رحب بينا الجرسون وإحنا بنتفرج على المنيو بطبق مقرمشات بنكهة الجمبري مع فنجان كركديه بالزنجبيل. المنيو في الحقيقة مليانة اختيارات كتيرة أكيد هترضي كل الأذواق، بس منيو التذوق تعتبر فكرة عبقرية بتقدر تشبع رغبات كل عشاق الأكل التايلاندي، واللي خايف يروّح! منيو التذوق بتتقدم برعاية الشيف نارونج بوتسريفوم، وسعر الفرد فيها 235 جنيه بحد أدنى فردين.

نبتدي مع المقبلات اللي كل واحد فينا بيتقدم له طبق فيه Poh Pia Pak وYam Neua YangوSatay Kai. إيه الكلام اللي بنقوله ده! خلونا نتكلم واحدة واحدة، Poh Pia Pak ببساطة عبارة عن قطعتين سبرينج رول مقليين ومقرمشين، وكل واحدة فيهم محشية خضروات بالتوابل التايلاندي المميزة بنكهة الزنجبيل والثوم اللذيذة، وبيتقدم معاهم شيلي صوص.

أما Yam Neua Yang فهو سلاطة ستيك على الطريقة التايلاندية. نشرح أكتر؟شرايح لحمة طرية وخيار وبصل وطماطم شيري وتوابل تايلاندي واضح فيها نكهة كزبرة جميلة. طيب إيه هو Satay Kai؟ دول يا سيدي سيخين فراخ مشوية بصوص السوداني المسكر شوية، وهو من غير كلام كتير البطل الحقيقي للأكلة.

قبل ما نوصل لمرحلة الأطباق الرئيسية، وصل الجرسون ومعاه شوربة Tom Yum Taley.الشوربة المكونة من عشب ليمون وزنجبيل كان فيها قطع مشروم وجمبري مستوي كويس جدًا وكاليماري وثعابين. كمية السي فوود الكبيرة في الشوربة كانت هايلة بس نكهة عشب الليمون والزنجبيل كانت قوية بزيادة بالنسبة لنا.

دقائق بسيطة ووصل الجرسون ومعاه كل الأطباق الرئيسية علشان نجرب كذا حاجة. البداية معKoongKratiemPrik Thai بشكله الجميل، وده جمبري مقلي وفلفل أخضر مشوي منقوع في صوص فلفل أسود مع ثوم وشيلي صوص. الجمبري بصراحة كان مستوي صح الصح والصوص عمل طعم لذيذ مسكر نوعًا ما وأضاف كتير لقوام الأكل.

المستوى المميز فضل مستمر مع KeangKeiow Wan Kai. الطبق مليان قطع فراخ طرية عايمة في كاري أخضر وصوص لبن بجوز الهند وبيتقدم معاه رز بسمتي سادة. نكهة اللبن المسكرة شوية عملت توازن مع الكاري الأخضر المولّع، وأكيد هو ده أحسن طبق جربناه يومها.

أخيرًا وليس أخرًا وصلنا لطبق Bah Mee Pad Pak، وهو شعرية بالبيض ومعاها بروكولي وشرايح خضار وصويا صوص خفيفة لها طعم مسكّر ونكهة ثوم واضحة. منتهى البساطة والتمكن.

حاولنا الأكل يفضل خفيف حتى مع الحلويات، وعشان كده طلبنا PollamaiRoum وهو طبق فاكهة طازة وبولة آيس كريم فواكه. طعم الآيس كريم واضحة فيه نكهة المانجو القوية مع طعم مشمش، وعجتنا النكهة اللذعة للباشون فروت الطازة مع الآيس كريم.

تجربتنا مع بيرد كيدج أكيد تستحق التحية. مافيش أتنين يختلفوا على الأجواء الجميلة هناك والخدمة الاحترافية الودودة، بس منيو التذوق اللي بيقدمها المطعم روعة وبتحقق الهدف المطلوب منها وهو إنك تجرب طعم كل حاجة.