The Definitive Guide to Living in the Capital , Cairo , Egypt

كتبت: شيماء الجمال

إحنا بنعتبر أنه المطاعم اللبنانية الحلوة مش كتيرة في القاهرة، علشان كده حبينا كافيه ومطعم بيت ورد لإننا حسينا لوهلة أنه أخدنا في حتة تانية بره مصر. يمكن من أكتر الحاجات المميزة في المكان ده هو الـAtmosphere  بتاعه إللي باين من اسمه “الورد”.

كل حاجة في المكان عليها ورد بالاستايل الـ Vintage اللي ناس كتيرة بتحبه. الحيطان عليها ورد والأطباق والبراويز والديكور حتى قمصان الـWaiters  متزينة بالورد.. حاجة تفتح النفس بصراحة على القعدة، ونضيف على ده صوت فيروز اللي بتسمعه طول ما أنت قاعد في المكان. الكافيه ليه كذا فرع منهم فرع المهندسين وبورتو كايرو وتيفولي دوم، وإحنا رحنا فرع تيفولي دوم علشان نكتب لكم تجربتنا من هناك بالتفصيل.

الفرع اللي في تيفولي دوم موجود كله في الدور اللي فوق وبتطلع له بسلم أنيق من على الجنب.. ودايمًا هتلاقي بنت ظريفة مبتسمة بترحب بيك بتسألك أنت حاجز مكان ولا لأ وبتتمشي معاك لحد المكان اللي هتقعد فيه. المكان مبدئيًا متقسّم لـ 3 أجزاء: التراس الـOut door  ودي أحلى قعدة للصحاب والشباب وأعياد الميلاد. وفيه جزء تاني أمام بار المشروبات وده مش كاجوال قوي زي التراس، ولا كلاسيكي زي الجزء التالت إللي هو المطعم وده أهدى جزء وهو قسم مناسب جدًا للعشا الهادي الرومانسي أو للاجتماعات البسيطة.

احنا اخترنا قعدة التراس ومن حسن حظنا إننا لاقينا مكان حلو فاضي نقعد فيه لإنه عادًة بيكون زحمة خصوصًا في الويك إنك. المنيو وصلت على طول وطبعًا الديزاين بتاعها يفتح النفس مليان ورد زي باقي ديكور المكان. المنيو أغلبها من المطبخ اللبناني مع شوية حاجات بحر متوسط وهي بصراحة متنوعة وفيها أصناف كتير. طبعًا لو أنت مش متعود على المطاعم اللبناني ساعات هتحس أنك محتاج ترجمة من الجرسون.. هتلاقي أصناف في المنيو زي الشنكليش والمفركة والشمندر مع الطحينة والمدردرة والهبرة والورديات والذي منه.

أول حاجة طلبناها من المزات الباردة هي ورق العريش/ ورق العنب (42 جنيه) وبصراحة طعمه كان حلو قوي على الطريقة اللبنانية ساقع وطري وطعمه مزز بالليمون وطبعًا لو أنت متعود على ورق العنب المصري التقليدي ممكن ما تسحش أنك مستسيغ الطعم قوي.

بعد كده وصل الطبق الرئيسي نصف فروج مشوي (60 جنيه) وده فعلًا من أحلى الحاجات عندهم لدرجة إننا رحنا مرة تانية وطلبناه وهو عبارة عن نصف فرخة مخلية ومشوية بتتبيلة متميزة داخل فيها صوص طماطم خفيف وشويها مضبوط وطرية، بيتقدم معاها قطعتين منقوشة بالبطاطس المحمرة، وبطاطس محمرة وخيار مخلل وتومية. والطبق كميته مش قليلة ممكن تكفي فردين لو أكلتهم مش كبيرة. الخيار المخلل مضبوط جدًا والتومية كمان حلوة وخفيفة.

طلبنا كمان ميني بيتزا بالبيبروني من منيو الأطفال (31 جنيه) علشان نكمل أكلنا ودي عبارة عن خمس قطع بيتزا مدورة صغيرة.. ما نقدرش نقول إنها بيتزا عظيمة هتعجب عشاق البيتزا لكن لو تعاملت معاها معاملة الفطيرات اللي بنحدق بيها مع الأكل هتكون راضي خصوصًا وإنه العجينة حلوة والجبنة نوعها محترم وخفيفة.

بقى بعد الأكل قلنا نجرب الحلو بقى فأكلنا مولتين كيك بالشيكولاتة وآيس كريم الفانيليا ( 44 جنيه).. طعمها مش وحش، لكن ما نقدرش نقول عليها حلوة بصراحة. يعني مثلًا إحنا متعودين إننا لما ندب الشوكة في الموتين كيك نلاقي الشيكولاتة سايحة ومغرقة الطبق ودي اللحظة الذهبية إللي بستناها كل عشاق المولتين كيك، لكن بصراحة ده ما حصلش معانا.. الكيكة كان الصوص فيها قليلة كانت شارباه كله وبولة الآيس كريم صغيرة نسبيًا بالنسبة لحجم الكيكة الكبير اللي ممكن يكفي 3 أفراد مستريح.

في النهاية ختمنا قعدتنا بكابتشينو كلاسيك (34 جنيه) وقهوة تركي مظبوط (19 جنيه) وكانوا تمام مافيهمش أي مشكلة خالص. فيه ناس في القعدة جربوا شيشة ميكس بيت ورد (55 جنيه) وده ميكس خاص بالمكان عبارة عن 8 أنواع فواكه مع بعض وهما بس اللي بيعملو وهو مختلف طعمه مميز ومختلف مش هتدوقوه في حتة تانية.

بيت ورد مكان حلو، قعدته مميزة وديكوره مريح نفسيًا والأكل حلو وإن كانت الأسعار مش قليلة لكن لو قارناها بباقي المطاعم اللبنانية زي عنب وليلى هنلاقي الأسعار قريبة جدًا.