The Definitive Guide to Living in the Capital , Cairo , Egypt

أكل الشوارع الشعبي اللي طعمه مميز له جمهور كبير في القاهرة، خصوصًا له اسم معروف وجودة أكله عالية وسعره على قد الايد، وفي الفترة الأخيرة سمعنا عن مطعم اسمه بيت اللحوم 2 بيقدم أكل شوارع بجودة ممتازة، فقررنا نروح نجرب، الأكل عندهم طعمه لذيذ وجودته عالية.

اعرفوا تفاصيل تجربتنا في المكان من السطور الجاية.

بيت اللحوم 2 موجود في منطقة عابدين الشعبية والشهيرة بالأكل، وهو مطعم تابع لجزارة، بيقدموا سندوتشات وحواوشي وكلهم مشويين على الفحم، وده بيدي الأكل طعم مختلف، والجودة بتاعتهم عالية، ورغم أن المكان صغير ويادوب فيه 5 ترابيزات قدامه في الشارع إلا أننا بنتنبأ لهم بمستقبل مبهر في مجال الاكل في القاهرة لو حافظوا على نفس الجودة.

في البداية نزل لنا سلاطة خضراء وطحينة مجانًا مع الأكل اللي طلبناه وعجبتنا جدًا الطحينة والسلاطة الخضراء، وأول طلب لينا كان السندوتشات وبدأناها بساندوتش إستيك وكان سعره 80 جنيه، والطعم حكاية بتتبيلة حراقة مميزة وده أكتر حاجة عجبتنا في السندوتشات لدرجة أننا أكلناه حاف من غير عيش، أما سندوتش الكفتة فكان سعره 35 جنيه وطعمه كان حلو ومافيهوش افتكاسات، ده غير ساندوتش السجق اللي كان بـ50 جنيه وطعمه مميز وطعم التتبيلة مش مغطي على الطعم الأصلي بالعكس مزوده حلاوته.

دخلنا على ليفل الوحش وطلبنا حواوشي أورمة بـ100 جنيه، وهو عبارة عن رغيف حواوشي مليان ومتقطع فيه لحمة طعمها واضح والتتبيلة مظبوطة بالمسطرة ومتسوي على الفحم ويستاهل كل جنيه يدفع فيه وخلاص إحنا هنعتمد الحواوشي من عندهم كوجبة لازم ناكلها دايمًا.

رغم أن المكان بسيط إلا أنه بيقدم مجموعة من الأكل متنوعة ومختلفة وكلها لحوم مشوية بمختلف أنواعها، هتلاقوا السمين والنيفة والكفتة والسجق واللحمة وخلافه، ومهما كان ذوقكم في الأكل هتقدروا تنبسطوا من طعمه، وفعلًا يستاهل أنه يكون منافس شديد في سوق أكل الشارع بالقاهرة.

العنوان: شارع الشيخ ريحان بجوار حلواني الشرقية – عابدين.

رقم التليفون: 01507244528

تقدروا تعرفوا أكتر عنهم من خلال صفحة الفيسبوك من هنا.

أو من خلال حساب تيك توك من هنا.