The Definitive Guide to Living in the Capital , Cairo , Egypt

عملنا زيارة لمطعم بيت العز المطل على النافورة الكبيرة في مول مصر 6 أكتوبر علشان نشوف هل فعلًا بيقدموا تجربة لبنانية متكاملة ولا لأ؟ المطعم فيه منطقة أوت دوور مطلة على النافورة ومسموح فيها بالتدخين، والمطعم نفسه مكيف من جوه.

المميز في بيت العز ألوانه ورسومات الورد على الأثاث، وكمان اللمسات المطرقعة زي الطرابيش اللي بتغطي الأنوار واللوحات والاكسسوارات المتعلقة على الحوائط. أجواء المطعم بصراحة مبهجة، ده غير إن عندهم فرن لخبز العيش، ويا سلام على ريحة العيش الطازة اللي تفتح النفس.

وصلنا لترابيزتنا وابتدينا نشوف المنيو بتصميمها الجميل والصور اللي عملت شكل مميز، بس الملاحظة هنا إن المنيو مش منظمة كويس.

بدأنا الأكل بمجموعة من المقبلات زي ورق عنب بزيت الزيتون (38 جنيه) وحمص بالطحينة (32 جنيه) وكبة مقلية (58 جنيه) وبطاطا حارة (38 جنيه). أول حاجة نزلت على الترابيزة كانت سلة عيش طازة وبعدها بدأت المقبلات تنزل في أطباق معدنية صغيرة.

ورق العنب بينزل فوق شوية خس وطعمه كان روعة، أما الحمص فكان حكاية وقوامه ممتاز. بعدها الدور كان على الكبة المقلية المكونة من أربع قطع كبار مقرمشين من بره ومن جوه اللحم المفروم المستوي medium، ومع كل قطمة تحس بطعم التتبيلة المميزة واللحمة الجميلة. أخر حاجة هي البطاطس اللي مكانتش مشطشطة بزيادة وفيها نكهة ثوم قوية جايز متعجبش كل الناس.

نروح على الأطباق الرئيسية ونشوف إيه نظام Meat Shokaf سعره (135 جنيه)وميكس جريل (140 جنيه). الطبقين بينزل معاهم بطاطس محمرة وثومية وخضار سوتيه.

الطبق الأول عبارة عن 8 قطع لحمة متبلة كويس جدًا ومشطشطة شوية، ويا سلام عليهم لما تغمسهم في الثومية اللذيذة. أما الميكس جريل فبيتكون من شيش طاووق وكباب وكفتة. طعم الكباب كان نفس طعم اللحم في الطبق الأول والكفتة كانت دسمة وعصارية وطعمها روعة، وأخيرًا الشيش طاووق كان متبل كويس وطعمه تحفة.

طبعًا كان لازم نحلي، والحلو النهارده طبق غريب شوية وهو غزل بنات بالآيس كريم (52 جنيه) – بتسألوا ليه غريب؟ أول حاجة: الطبق طلع آيس كريم فانيليا عليه غزل بنات أبيض. تاني حاجة: طعم الآيس كريم كان أقرب للمستكة، أما طعم غزل البنات فكان عادي.

بيت العز في كل الأحوال عمل حالة مميزة، من الخدمة الهايلة للأكل الكويس والأجواء اللطيفة، وممكن نعتبره نسخة أحسن من مطعم زي ستوديو مصر. السؤال دلوقتي هل بيت العز بيقدم حاجة مختلفة؟ بصراحة لأ، بس المهم إنهم شاطرين في اللي بيعملوه، وده المطلوب من أي مطعم.