The Definitive Guide to Living in the Capital , Cairo , Egypt

رنا شرف

إحنا بنحب كل أنواع الأكل، لكن الأكل المصري بالنسبة لنا عالم تاني بنحب نهرب له في أوقات كثيرة، والهروب بيكون لمطاعم بتعمل أكل مصري على أصوله، ومؤخرًا حبينا نخوض تجربة الأكل في مكان متخصص في الأكل المصري بشكل عام وفي الحمام بشكل خاص، وهو بيت الحمام، الموجود في الرحاب.

في السطور الجاية هنعرفكم على تفاصيل تجربتنا في بيت الحمام.

بمجرد ما تدخل بيت الحمام هتحس براحة، المكان واسع وديكوراته مريحة للعين، والأبيض والأسود طاغيين على الألوان في المكان.

نقدر نقول إنه مناسب جدًا للعائللات أو الأصحاب اللي بيدوروا على خروجة تفكرهم بأكل زمان.

نيجي بقي للأكل…

أول حاجة جربناها كنت طاجن حمام بالأرز المعمر، وحقيقي الطعم كان وهمي وحسينا إن الأكل خفيف مش تثيل على عكس المتوقع، والطاجن فيه عدد معقول من الحمام، وسعره 298 جنيه، وده سعر حسيناه معقول لأن الطاجن مشبع فعلًا.

ومن المقبلات طلبنا مشكل محاشي، الطبق كان حلو بس سبايسي بدرجة كبيرة، ودي حاجة ضايقتنا وممكن ماتناسبش كثير من الناس اللي مش بتحب الأكل الإسبايسي، سعر الطبق 65 جنيه.

طلبنا كمان من عندهم فراخ المسحبة، كانت حلوة وعجبتنا فعلًا.

وعلشان مش معقول مانجربش السمبوسك وإحنا في رمضان، طلبنا من عندهم سمبوسك وكانت مظبوطة ومعمولة حلو وفكرتنا بالطعم البيتي الأصيل وسعرها 75 جنيه.

كمان جربنا مشروب رمضاني هو التمر هندي وكان مظبوط في الطعم ومنعش وده سعره 35 جنيه.

نقدر نوصف تجربتنا بأنها كانت إيجابية بدرجة كبيرة، تميزت بأكل جودته حلوة وسعره معقول جدًا، وعلشان كدة هنجرب المكان ده تاني كل ما نشتاق للأكل المصري.