The Definitive Guide to Living in the Capital , Cairo , Egypt

زمان لما كنا بنحب ناكل أكلة حلوة، كنا بنختار “بيبو” مصر الجديدة، وده لأننا كنا بنبقى عارفين إنه بيعمل أكل حلو وقعدته لطيفة وخدمته كويسة، وكان المكان معروف إنه مميز في الطواجن بتاعته. لكن واضح إن الحلو مش بيدوم، لإن تجربتنا الأخيرة في فرع مصر الجديدة، كانت سلبية بدرجة كبيرة!

في الموضوع ده، هنقول لكم على كل اللي محتاجين تعرفوه عن تجربتنا في مطعم بيبو، سواء الخدمة أو الأكل اللي بيقدمه المكان.

في البداية إحنا حجزنا عن طريق الواتس آب ترابيزة، وبلغنا كمان بالأوردر بتاعنا، ولكن لما روحنا اكتشفنا أن مافيش حجز باسمنا، على الرغم من إنه تم تأكيد الحجز على واتس آب، وكان التبرير إن الشخص اللي أخد الحجز مننا ماجاش المطعم اليوم ده، فمبلغش بالحجز!

ومن الواضح أنه مكنش إحنا بس اللي كان عندنا مشكلة، الكارثة إننا لم عبرنا عن غضبنا جابوا لنا شخص ما، عرف نفسه بإنه مدير في الفرع وقال لنا إنه ههشوف للنا ترابيزة بس هنحتاج نستنى شوية وطلب مننا بشكل واضح ومباشر “نعيد عليه”! يعني بيطلب مننا إكرامية!

لما “لمدير” ده، اللي إحنا محتفظين باسمه، لاحظ رفضنا للطريقة دي، تجاهلنا، ورفض حتى ياخد مننا الأوردر تاني! وهنا قررنا نتصرف إحنا بنفسنا وطلبنا من موظف تاني يساعدنا، وأخد الأوردر مننا وبالفعل قعدنا ونزل لنا الأوردر في وقت قياسي، والموظف قدم لنا خدمة حقيقية بدون مقابل.

بدأنا تجربتنا بمكس مقبلات بيبو اللي سعره 120 جنيه، وكان عبارة عن كفتة وكبدة ولحمة، ونقدر نقول إن جودته كانت متوسطة، بعيدًا عن أن الكفتة كانت مش لطيفة خالص، وكمان جربنا فتة سجق سعرها 70 جنيه، والصلصة بتاعة الفتة كانت محتاجة تتعمل بشكل أحسن علشان طعمها يتظبط، والأرز كان للأسف مقرمش والعيش مش طري، وحتى السجق للأسف كان بارد ومش لطيف.

كمان جربنا من عندهم طلب ربع كفتة كندوز وسعره 70 جنيه، وزي ما قلنا إن الكفتة ماكنتش ألطف حاجة، ونقدر نقول إنها كانت أسوأ حاجة في المكان كمان، وطلبنا نصف فرخة مشوية بسعر 65 جنيه، وكانت لطيفة وعادية.

جربنا كمان نصف فرخة رول محشية فريك وسعرها 75 جنيه، ودي كانت أفضل ما في اليوم، الفراخ عبارة عن نص فرخة مقطعة بالطول، ومحشية فريك ومتسوية كويس وطعمها لطيف جدًا.

تجربتنا بشكل عام في المكان ماكانتش أفضل حاجة، وللأسف مش حابين نروح المكان تاني، لأن طعم أغلب أصناف الأكل وتعامل الموظف الأولاني معانا، والزحمة والدوشة اللي في المكان، خلونا نقول من جوانا مافيش فايدة!

بنتمنى يطوروا ويحسنوا من خدماتهم وأكلهم، خاصة أنهم اسم كبير وفي منطقة مميزة، وإحنا هنفرح جدًا لو “بيبو” رجع تاني “بيبو” بتاع زمان!!

وعلشان تعرفوا أكتر عنهم زوروا صفحتهم على فيسبوك من هنا.