The Definitive Guide to Living in the Capital , Cairo , Egypt

المطاعم اللي بتقدم أكلات شاملة مافيش أكتر منها في القاهرة، وواضح إن شعبيتها بتزيد يوم عن التاني، خصوصًا إن مافيش أحسن من منيو فيها كل حاجة وتناسب كل الأذواق. الفكرة إن مع زيادة عدد المطاعم دي المنافسة شدت على الأخر، فلازم كل مكان يعمل حاجة مختلفة وجديدة علشان يثبت مكانته على الساحة.

واحد من الأماكن اللي عملت اسم لنفسها بيبر جريل الموجود في مجمع مطاعم باتيو القاهرة الجديدة، واللي نقدر نصنفه في فئة المطاعم العالمية الشاملة زيه زي فيرسال وستيك آوت.

في الأول قررنا نجرب طعم كل حاجة، وعلشان كده طلبنا طبق مقبلات بيبر كواترو (٨٠ جنيه) المكون من موتزاريلا ستيكس وحلقات بصل وتشيكن ستريبس وسبرينج رولز، ومعاهم أربع صوصات مختلفين.

نبتدي الحكاية مع حلقات البصل ونقول إن طعمها كويس بس مافيش نكهة مختلفة، والموتزاريلا ستيكس كانت مستوية كويس وطعم الجبنة فيها ممتاز. نروح للسبيرينج رولز اللي كانت على غير العادة مش مقفولة، بس المهم إنها كانت مقرمشة ومحشية كوكتيل خضروات هايل. نجم الطبق بدون منافس كان التشيكن ستريبس المستوية كويس جدًا وطعم الفراخ الطرية حكاية.

ندخل على التقيل ونبتدي بالتشيكن كوردون بلو (٨٩ جنيه) وطلبنا معاه بنّا باستا، والطبق ده عبارة عن  حتتين فراخ كبار مستويين كويس ومحشيين جبنة لذيذة، وطبعًا اللحم المدخن عمل طعم ولا أحلى، ومسك الختام كان صوص المشروم، وبكده نقدر نقول وضميرنا مستريح إنه طبق أسطوري. لازم كمان نتكلم عن الباستا المستوية كويس والصوص الأبيض اللي عملوا دويتو روعة.

الطبق التاني كان تريبل تندر بيف (١٤٤جنيه) ومعاه بطاطس مهروسة ورز صيادية، عبارة عن ثلاث قطع لحمة مدورين حسينا فيهم بطعم مر شوية، بس كانت طرية ومستوية كويس.

اللحمة كان عليها ثلاثة صوصات مختلفين، الأولاني كان حاجة شبه الصلصة مع نكهة زيتون خفيفة، والخلطة دي بصراحة مش لايقة على اللحمة خالص. تاني صوص كان بلو تشيز جامد عمل طعم أقوى شوية لقطعة اللحمة، وأخر حاجة كانت هوني مسطرد بطعمها المسكر مع لمسة مززة كده عملت طعم لذيذ للأكل.

البطاطس المهروسة كانت مطبوخة كويس بس ناشفة شوية وعليها صوص بيستو على غير العادة، وبصراحة البيستو مكانش له لزوم وماعملش أي إضافة للطبق، أما الرز فكان عليه خلطة توابل وأعشاب وأكتر حاجة واضحة ومسيطرة على طعمه كانت القرفة مع نكهة مسكرة خفيفة عملت طعم مختلف للرز، بس الطعم بشكل عام مكانش ماشي مع معظم الصوصات.

البطاطس المهروسة كانت مطبوخة كويس بس ناشفة شوية وعلى غير العادة عليها صوص بيستو، وبصراحة البيستو مكانش له لزوم ومفيش أي إضافة للطبق.

بيبر جريل زي كتير من المطاعم اللي في نفس فئته بيقدم تشكيلة من المشروبات بأسامي مبتكرة، وإحنا مكدبناش خبر وطلبنا ميلك شيك شوكولاتة (٣٤ جنيه) طلع خفيف شوية بسبب كمية التلج الكبيرة، وكمان طعمه مكانش حلو زي ما توقعنا.

جربنا كمان المالتيزرز (٣١ جنيه) اللي ملهاش أي علاقة باسمها. التركيبة على بعض كانت منعشة، عبارة عن فراولة ومانجو وجوافة وعليهم آيس كريم وشوية مالتيزرز على الوش، بس المشكلة إن المالتيزرز مكانتش ماشية مع باقي مكونات المشروب وفايدتها إنها عملت شكل حلو للكاس.

في النهاية نقدر نقول إن بيبر جريل مطعم لطيف وبيعمل أكل لذيذ مع الخدمة الكويسة والموقع الممتاز. الفكرة إنه مش بيقدم أي حاجة مختلفة عن باقي المطاعم اللي في نفس فئته، فمن السهل يتنسي بسرعة.