-
بوينت 90 مول، القاهرة الجديدة.
-
عالمي
-
Omar Yousry
مولات وراء مولات بتفتح في القاهرة الجديدة، وطبعًا عدد كبير من سلاسل المطاعم الشهيرة بتفتح فروع جديدة لها في المنطقة المهمة من أرض مصر، ومنهم مطعم " بليز- Blaze".
سلسلة بليز حاليًا بتتكون من فرعين، واحد في النزهة والثاني في المهندسين، ودلوقتي فرعهم الجديد موجود في قلب القاهرة الجديدة وتحديدًا في مول بوينت 90 قصاد البوابة الرئيسية للجامعة الأمريكية.
صحيح من النظرة الأولي هتشوف المكان صغير جدًا، يعني منطقة الـ إن دور تقريبًا مش موجودة، بس المهم إن المطعم بيحتل مساحة كبيرة آوت دوور تتميز بأجواء هادئة، وكنب وكراسي تحس معاهم بأجواء اللاونج المريحة.
دخلنا على المفيد على طول، ومن قسم المقبلات طلبنا بافالو وينجز مخلية (40 جنيه) وتكساس تشيلي فرايز (45 جنيه)، أجنحة الفراخ اللي بيتقدم معاها صوص بلو تشيز كانت غرقانة في صوص البافالو اللاذع بنكهتها السبايسي المعقولة، والتركيبة ده عملت شغل عالي مع صوص البلو تشيز. أما الفراخ نفسها فشربت الصوص تمام وبالتالي كانت طرية وعصارية.
نروح للتكساس تشيلي فرايز المكونة من جبنة سايحة ولحم مفروم فوق البطاطس المحمرة، وكلهم محطوطين في طاسة ساخنة. كان واضح إن نكهة الجبنة مسيطرة على الطعم وأخفت أي وجود للحم المفروم وكمان البطاطس كانت مزيتة شوية.
أما بالنسبة للأطباق الرئيسية فطلبنا كوردون بلو (69 جنيه) وفاهيتا تريو (79 جنيه)؛ الطبق الأول كان هايل، قطعتين صدور فراخ مقلية كبار محشيين تركي مدخن وجبنة مع صوص مشروم، المهم إن الطبقة المقلية كانت لذيذة والفراخ من جوه طرية وحلوة. طعم الجبنة بصراحة كان رهيب وطبعًا صوص المشروم عمل تركيبة ممتازة، ونقدر نقول إن الطبق بشكل عام كان ممتاز.
الأرز اللي مع الطبق رغم تتبيلته الكويسة ماكانش ماشي مع الطماطم والجبنة المبشورة اللي عليه، أصل الفكرة إن طعم الجبن الشيدر الأحمر القوي ولذعة الطماطم طغوا على طعم الأرز، فاضطرينا إننا نشيلهم علشان نقدر نستمتع بطعمه.
الفاهيتا وصلت على طاسة ساخنة طالع منها البخار، وكانت عبارة عن شرائح مشوية من البيف والفراخ والجمبري مرصوصين فوق فلفل أخضر وبصل أضافوا كثير لطعم ورائحة الطبق. الطبق كمان بيتقدم معاه أرز مكسيكي وساور كريم وبيكو دي جالو وجبنة شيدر وعيش تورتيا علشان تقدر تعيش تجربة التيكس ميكس على أصولها.
مافيش شك إن الطبق بيقدم نفس النكهة المكسيكية المميزة، وطعم البيف والفراخ والجمبري المملحين نوعًا ما عمل طعم قوي للطبق، خصوصًا لما تضيف الأرز المكسيسكي الأحمر السبايسي بطعمه اللذيذ.
جربنا كمان أثنين ميلك شيك تشيز كيك أوريو وفراولة (29 جنيه للواحد). الميلك شيك وصل في برطمانات زجاج، وبصراحة شكلهم كان يفتح النفس. الأوريو ميلك شيك كان لذيذ وقوامه سميك، والكريمة المخفوقة اللي عليه كان فيها حبيبات – من قطع الأوريو – عملت طعم هايل.
أما الميلك شيك تشيز كيك فراولة فتقدر تميز طعم الفراولة بعد ما تخلص – ودي حاجة مش وحشة أكيد – وفي نفس الوقت له نفس القوام السميك وطعمه منعش.
خلصت أكلتنا مع فرينش توست بانانا (32 جنيه) وده عبارة عن قطعتين توست وبينهم قطع موز ونوتيلا وكراميل، وعليهم بولتين آيس كريم فانيليا. تخيلوا معايا التوست المقرمش وجواه المكونات الملخبطة دي وطعمهم الرائع؛ فعلًا من أطباق الحلو المتوازنة واللذيذة.
نقدر نقول أن بليز يجمع بين طاقم موظفين هايلين وأجواء لطيفة وكمان أكل ممتاز، ويعتبر من الإضافات المهمة لأسطول مطاعم القاهرة الجديدة اللي شعبيتها بتزيد يوم بعد يوم.
