The Definitive Guide to Living in the Capital , Cairo , Egypt

رنا شرف

خبر حلو لكل عشاق الأكل اللبناني، واللي سافروا لبنان وأكلوا من عند بسطرمة مانو في جبل لبنان، واللي بيعتبر علامة مميزة في عالم البسطرمة في لبنان. النهارده بسطرمة مانو أصبح في القاهرة، وتحديدًا في الميرغني.

بسطرمة مانو هو مطعم مشهور، فتح أبوابه في لبنان من أكتر من 50 سنة، وبيعتبر علامة من علامات لبنان، وكل اللي بيسافر هناك لازم يروح يزور المطعم.

قررنا نزور المطعم، ونعرف مستوى المكان وجودة الأكل وشكل الخدمة، وأكتر. اسمحوا لنا ننقل لكم تجربتنا في السطور الجاية.

الزحمة في المكان ملفتة، ودي اللي أول حاجة ممكن تلاحظها هناك، لكن الحقيقة إنها زحمة منظمة، كل واحد له دور، ومافيش تأخير في الأوردرات، وده يعتبر حاجة حلوة بتفتقدها مطاعم كتير.

نيجي بقى للسندوتشات؛ المطعم بيقدم شاورمات وبسطرمة وسجق وفاهيتا وروستو. إحنا جربنا روستو بالجبنة، كان سعره 85 جنيه، وده تقريبًا أغلي حاجة في المطعم. الساندوتش كان بالخبز الإفرنجي على الطريقة اللبنانية، وبصفة عامة كل اللحوم والخبز تقريبًا بيتعملوا على الطريقة اللبنانية الصح، وده بشهادة الناس اللي جربوا أكل لبنان. الخلاصة إن ساندوتش الروستو عدى العظمة بمراحل، وطعم الروستو باين فيه وحبينا الخس والطماطم. والمايونيز طعمه مش ظاهر قوي، ودي حاجة حلوة خلتنا نستمتع بالساندوتش.

تاني ساندوتش جربناه كان مقانق، وبرضه بالخبز الإفرنجي، وفيه طماطم ومخلل، وسعره كان 60 جنيه، وطعمه أقرب للسجق المصري، وعجبنا جدًا جودته.

تالت ساندوتش كان فاهيتا دجاج، وده سعره كان 60 جنيه، وبرضه بالخبز الإفرنجي، وفيه المخلل والخس والمايونيز الخاص بالمطعم.

أكتر حاجة حبيناها في المطعم، إن الأكل خفيف ومش دسم عكس ما كنا متوقعين، وعرفنا إن كل البهارات جاية من لبنان وأرمينيا والمعدات معظمها جاي من لبنان.

كمان الشيف اللي بيشتغل في المطعم هو نفسه اللي كان شغال في لبنان، علشان كدة الطعم واحد.

وأخيرًا..

تجربتنا في المكان كانت حلوة، وأكيد هنزور بسطرمة مانو مرة تانية.