The Definitive Guide to Living in the Capital , Cairo , Egypt

من الصين لأمريكا لمصر، “باندا هاوس” عمل لنفسه اسم مميز في عالم المأكولات الصينية، ومع ذلك فرعه في “سيتي ستارز” لا يعتبر منافس قوي لفرع “الركن الآسيوي” الموجود في نفس الفوود كورت في سيتي ستارز. وهي حاجة ظريفة عمومًا أنك تلاقي أكثر من بديل للأكل الصيني في مول في كايرو.

العمال في المكان ممكن يوصلوا الأوردر لحد الترابيزة وبسرعة، أسلوب طلب الأكل نفسه سريع ومنجز، وقليل لما المكان بـ يتزحم وتبقى مش عارف تطلب، والكاشير هـ يساعدك ويرد على كل استفساراتك بخصوص المنيو، بالذات لما تسأل عن اسامي المأكولات الصينية ومكوناتها غير المألوفة.

المنيو عبارة عن أرز أو نودلز للأطباق الجانبية، والمكونات الرئيسية لحوم ودجاج، والكومبو بـ يبقى أرز أو نودلز ولحوم ومافيش مشروب. ممكن تبتدي بدجاج الوان تان كمشهيات (8 جنيه) وهي عبارة عن دجاج ملفوف في عجين وبـ يتقلي، بس المشكلة أنه بـ يوصلك عبارة عن عجين مقرمش وجواه قطعة دجاج صغيرة جدًا. طعمها مش بطال بس كانت صعبة شوية على السنان واحنا بـ نقطمها.

طبق دجاج الهاكا والنودلز (17 جنيه)  كان في رأينا من أحسن الأكلات في المحل، النودلز كان فيها مهرجان ألوان علشان مليانة فلفل أحمر وأخضر وجزر وبصل، والدجاج كان مسكر ولذيذ وساخنة مولعة، والدجاج بصوص الصويا (22 جنيه) عجبنا قوي  بس الأرز مع الكومبو ده كان ناشف شوية ومش طازة قوي. هو الأكل عمومًا كان ممكن يبقى أحلى لو لسة بـ يتطبخ قدامك أو مش متحضر من بدري ومحطوط في العرض من أول اليوم.

مستوى الأكل ممكن يختلف على حسب الحاجة اللي بـ تطلبها، والناس اللي غاويين أو مدمنين أكل صيني ممكن ما يحبوش “باندا هاوس” بس في النهاية هو اختيار ظريف لو عايز أكلة سريعة وخدمة أسرع والنودلز تستاهل التجربة.