![بالفيديو: تريفور جيمس.. فوودي عالمي بيجرب أكل كايرو](https://assets.cairo360.com/app/uploads/2018/10/12716090_1109752169057499_8616139615932056627_o-875x323.jpg)
Mohammed Sabry
عشاق الأكل موجودين في كل مكان في العالم. ولو هنتكلم عن مصر بس، هنلاقي ناس كتير بتحب الأكل ومشهورين على السوشيال ميديا. بيجربوا أكلات كتيرة ومختلفة، جوة وبره مصر. وبما إن الأكل المصري مميز وله طابع خاص، فطبيعي ييجي مدون عالمي من بره مصر، علشان يجرب أكلات القاهرة المختلفة.
ده اللي عمله المدون العالمي “تريفور جيمس”، أدمن صفحة “The Food Ranger”، لما قرر ييجي مصر علشان يجرب الأكل في الإسكندرية والقاهرة.
نشر “تريفور” فيديو عن تجربة الأكل في القاهرة. واللي أكل فيها أنواع مختلفة زي الفول والطعمية، الشاورما، الكشري، وطبعًا مافاتهوش يعدي على كبدة البرنس في إمبابة. وكان واضح جدًا إعجابه وانبهاره بالأكل. وكمان كان بيركز على طريقة عمل كل أكلة بالتفصيل.
“تريفور” اللي بيتابعه على صفحات السوشيال ميديا أكتر من 3.5 مليون متابع، بدأ تصوير فيديوهات عن الأكل في 2013. ولحد ما استقر في مدينة “تشينج دو” في الصين في 2014، كان صور حوالي 50 فيديو. ومن ساعتها قرر إنه يستمر في عمل فيديوهات متنوعة عن الأكل، في كل أنحاء العالم. تقدروا تتابعوا صفحته على فيسبوك من هنا.