The Definitive Guide to Living in the Capital , Cairo , Egypt

رنا شرف

كلنا بنحب جاردن سيتي، خصوصًا لما بنشوف لها صور من الخمسينيات أو الستينيات، عصر القاهرة الذهبي. مؤخرًا اتعرفنا على مكان بنكهة الزمن الجميل، مطعم بينقلك لحقبة زمنية كلها حنين وحب، مع أكل مميز، وقعدة مريحة في جاردن سيتي.

خلونا نعرفكم أكثر على تجربتنا في مطعم (باتريموان دو كير -Patrimoine Du Caire).

المكان عبارة عن فيلا، وبمجرد ما هتدخل من البوابة إنك في مكان مبهر وبسيط في نفس الوقت، الديكور خمسيناتي، والفيلا بتشبه الأماكن اللي كنا بنشوفها في أفلام الأبيض والأسود، متقسمة لعدة غرف، غرفة للموسيقى، وغرفة للكتب والقراءة، وغرفة للتصوير..

المكان مليان أنتيكات وصور لفنانين وفنانات من الزمن الجميل، زي سامية جمال وتحية كاريوكا، ده غير إعلانات زمان القديمة.

نيجي بقى للأكل! عرفنا إن المكان مميز بأطباق مش منتشرة قوي في القاهرة، زي لحم الغزال والنعام. حبينا نجرب من عندهم لحم النعام، والطب كان سعره 220 جنيه، وينزل معاه بطاطس وأرز. وبشكل عام الطبق كان حلو، واللحمة مستوية كويس وطعمها مبهج، وحتى البطاطس المحمرة كانت مميزة رغم إننا كنا نتمنى إن الكمية تكون زيادة شوية.

بعد طبق لحم النعام الحلو ده، قررنا نطلب عصير ليمون بالنعناع، لكن المشروب اللي بنحب نطلبه في أماكن كتير ماكنش مميز، ومكوناته ماكنتش مظبوطة خالص، وهو سعره 55 جنيه.

حبينا نعوض بحاجة حلوة؛ طلبنا تشيز كيك، ودي بقى كانت رائعة، ونقدر نقول إنها عوضتنا عن الليمون بالنعناع، وكان سعرها 65 جنيه.

بصفة عامة حبينا المكان، وحبينا الأكل والقعدة الخمسيناتي اللي رجعتنا لزمن بنحبه، وأكيد هنكرر التجربة تاني.

اعرفوا أكثر عن المكان من خلال صفحتهم على فيسبوك.