The Definitive Guide to Living in the Capital , Cairo , Egypt

مش كتير بنلاقي مكان يجمع ما بين جمال الديكور وحلاوة المنظر وجودة الأكل والشرب وكمان الخدمة بحب، لكن في “El Villa الڤيلا” اتجمعت كل حاجة فريدة وحلوة في مكان واحد هتخليكم تستمتعوا بقعدة وروح هتنقلكم من العصر الحالي للماضي الجميل بمجرد دخولكم المكان. خلال السطور الجاية هنقول لكم على تجربتنا في مطعم وكافيه El Villa الڤيلا جاردن سيتي.

البداية أول ما تدخلوا El Villa الڤيلا فيه حد متخصص هيلف معاكم في المكان علشان يعرفكم على تفاصيله اللي مليانة حكايات وكل ركن وقعدة له قصة لازم تعرفوها، وأولها أنكم أول ما توصلوا هتقعدوا في “صالون القاهرة” وده ويتينج سبيس بترتاحوا فيها لما بتوصلوا، وفيها بيشتغل جرامافون علشان تسمعوا أحلى الألحان بتاعة زمان.

وكمان فيه ركن “البلكونة الإيطالي” وفيها 5 ترابيزات وكل ترابيزة باسم مدينة من إيطاليا، وكل الأغاني اللي بتشتغل فيها بتكون فرنسية أو إيطالية، ده غير الـWork Room وده مكان للمذاكرة والشغل، وفيه 4 ترابيزات وبيشغلوا فيهم مزيكا هادية تساعدكم على التركيز.

أما البينك رووم، فدي بقى بأجواء نسوية، مريحة للبنات والكابلز بألوان البنات بتحبها، وترابيزاتها كلاسيك، وبيشغلوا أغاني قديمة مميزة فيها، وكمان فيه الميوزيك رووم، اللي كلها صالونات كلاسيك وهي حجرة فنية، وقريب هيكون فيها شخص بيعزف بيانو علشان يكملوا الديكور.

ومن ضمن الديكور فيه قعدة عربي شعبي، ودي قعدة على الأرض زي قعدات سيوة ودهب، وبيشغلوا فيها أغاني فلكلور مصري، وأخيرًا المقصورة الملكية، اللي كل ترابيزة فيها باسم حد من العائلة الملكية القديمة “فاروق – ناريمان – فريدة – فريال – فوزية”، وأفضل وقت للقعدة فيها بعد العصر علشان الشمس والفيو بتاعها بيطل على أجمل عمارات منطقة جاردن سيتي.

وقررنا نطلب من عندهم فراخ بصوص الأعشاب، ودي عبارة عن قطعتين فراخ، طعمهم جميل جدًا، ومتسويين صح، ومعاهم أرز أبيض متسوى صح وطعمه مميز، وبطاطس بوريه مhفيش أجمل منها، وبرغم أن الكمية قليلة لكن الطعم كان حكاية.

كمان طلبنا من عندهم طاجن أم علي سخن، ورغم أنه بالمكسرات إلا أنه ماكنش فيه غير فول سوداني بس، وماكنش أحسن حاجة، ومحتاج يتظبط أكتر في الطعم والخامات، وكمان طلبنا فنجان قهوة، وخلينا نقول أنه الفنجان ده من أجمل فناجين القهوة اللي ممكن تشربوها في وسط البلد، وبننصح بيه بشدة، وماتنسوش تاخدوا القهوة في الهواء الطلق.

تجربتنا في المجمل كانت مرضية، وفريق العمل بيخدمكم بحب وبيساعدكم في الاختيار سواء للأكل أو القعدة، وكمان طول الوقت هتلاقوهم حواليكم بشكل مايجرحش خصوصيتكم.

وعلشان تعرفوا أكتر عنهم تقدروا تزوروا صفحتهم على الفيسبوك من هنا.