The Definitive Guide to Living in the Capital , Cairo , Egypt

الأكل الإيطالي له حب خاص مهما نجرب من مطابخ بتفضل المكرونة والبيتزا هم الملاذ اللي بنلجأ له لما نزهق من الأكل العادي والـ مولينو في المعادي قدم لنا أحلى تجربة فطار ممكن نستمتع بيها.

المكان مناسب جدًا لفطار الصبح بدري مع الشجر حواليه، والسقف اللي بيفتح لما الشمس تخف، الديكور بسيط مش متكلف، وريحة الكرواسون والعيش تجوعك حتى لو جاي شبعان.

طلبنا ساندويتش The green بـ 48 جنيه، وMediterranean بـ 50 جنيه، وبيتزا بكل أنواع الجبن بـ 69 جنيه، وعصير كيوي بـ 33 جنيه، وعصير Nile smile بـ 29 جنيه.

سموزي الكيوي كان حلو جدًا ومنعش ومن غير سكر بس فعلًا طعمه كان روعة، أما الساندويتش The  green فده مناسب جدًا لأي حد نباتي لأنه كله خضروات بس مع عيش بني، والخضروات عبارة عن كوسة وباذنجان وطماطم، وجرجير وفلفل ألوان، وطعمه كان متناسق جدًا.

أما  ساندويتش Mediterranean فهو عبارة عن قطع جبنة حلوم مقلية مع طماطم وزيتون في عيش بني، وبرضه طعمه كان خطير ومنعش والجبنة كانت مقلية بحرفية مش محروقة ولا يادوبك لمسة النار كانت كما يجب أن تكون.

نيجي بقى لعصير Nile smile فده عباة عن سفن أب مع ليمون ونعناع وثلج مجروش وسكر بني، ولازم نعترف أن العصير ده أشبه بالطلقة في الدماغ يعني لو عاوزين حاجة تنعشكم وتخليكم مفوقين ومافيهاش سكر يبقى هو ده.

البيتزا بقى كانت إيطاليا 100% من أول العجينة الرفيعة لحد الجبن اللي طعمها حكاية بس لو يقللوا الزيت شوية كنا هنستمتع جدًا.

خلصت تجربتنا في الـ ميلانو بس الأكيد أنها مش هتكون زيارتنا الأخيرة.