The Definitive Guide to Living in the Capital , Cairo , Egypt

عشاق الخروجات دائمًا عندهم هم البحث عن أماكن أكل ليها شخصية مستقلة، وبيفرق معاهم كتير لما يكون المكان ده مميز في خدماته وأكله، وعلشان كده إحنا في كايرو 360 بنروح طول الوقت أماكن مختلفة حتى لو كانت بعيدة علشان ندوق الأكل المصري الأصيل، أو نستمتع بتجربة أكل مختلفة سواء في طرق تقديمها أو في طعمها وجودتها، وده اللي لقيناه في مطعم المحمدي في الشيخ زايد، واللي قررنا نجربه علشان نقدر نعرفكم عليه أكتر.

المكان فخم وموجود في إحدى مولات الشيخ زايد الجديدة ورغم أنه كبير في مساحته، إلا أن العدد الكبير للكراسي والترابيزات موضحين جدًا أن المكان مزدحم ومخنوق، يعني كان محتاج يتنظم ويتنسق بشكل مختلف.

فيه عندهم 3 أماكن للجلوس منهم مكان أوبن إيريا، وفريق العمل خلية نحل شغالة ولكن الزحمة بتاعة المكان كانت بتخليهم يتأخروا شوية سواء علشان تلاقي حد منتبه لتنفيذ طلبك أو حتى علشان يعمل حاجة مفترض تتعمل بسرعة زي مثلًا أنهم يشيلوا الأطباق اللي خلصت ومايسيبوهاش لحد ما نطلب ده.

بدأنا تجربتنا بشوربة لسان عصفور سعرها 29 جنيه، وشوربة المحمدي الحراقة وبقطع الفراخ والمشروم بسعر 59 جنيه، وبعيدًا عن الطعم الجميل بتاعهم ولكن طريقة التقديم للطبق وحدها كفيلة أنها تبسطكم علشان هي بتنزلكم على الترابيزة في سرفيس مخصوص في نصه فحم والع بيخلي الشوربة طول الوقت سخنة.

كمان طلبنا طاجن ورق عنب باللحمة والعكاوي، وسعره 140 جنيه، ولكن للأسف نزلنا لحمة بس ومالقناش غير قطعة عكاوي واحدة، وكانت للأسف مش أحسن حاجة.

طبق ورق العنب كان كبير جدًا، وكان طعمه حلو، وخلوا بالكم إن ورق العنب متسوي باللية، وهما مش بينبهوا على ده، ورغم أنه الطاجن كان لطيف ولكن لو أنتم مش من محبي اللية فبلاش منه.

كمان طلبنا شواية مراكش، ودي سعرها 420 جنيه، ودي لازم يقوم بيها 2 لأنها طلعت كبيرة، ولكن لينا عليها ملاحظات كتير، أولها أن ماينفعش الفراخ تبقى تسويتها وسط بدون طلب العميل، لازم تكون متسوية بالكامل.

والحواوشي مش الواو ونقدر نقول عليها “عيش باللحمة”، لكن من ناحية تانيةن الريشة واللية اللي كانت في الشواية اللي نزلت بدخانها وسخونيتها كانوا أفضل حاجة فيها.

أما الحلو فكان عبارة عن طبق ثلاثي سعره 85 جنيه، بيكون فيه أطباق صغيرة من “كريم بروليه” وهي كاسترد كريمي متغطية بسكر مكرمل والويتر بيكرمل السكر قدامكم بجهاز مخصوص، و”مهلبية فرن” متزوقة بالشيكولاته، و”بنوفي تارت” وهي طبقات من البسكويت والطوفي والموز متغطي بالكريمة وقطع الشيكولاته، ومستواه مش بطال ولكن يارب الفترة الجاية يطوروه ويظبطوه أحسن.

وعلشان تعرفوا أكتر عن مطعم المحمدي زوروا صفحتهم على فيسبوك من هنا.