The Definitive Guide to Living in the Capital , Cairo , Egypt

المطبخ الآسيوي وجد لنفسه مكانة متميزة عند القاهريين اللي بـ يحبوا الخروج والأكلات غير المعتادة، ما بقاش فيه مول كبير أو ساحة طعام مافيهاش مطعم أو اثنين بـ يقدم أكلات من الصين وتايلاند والهند وأحيانًا كوريا كمان، ناهيك عن السوشي اللي بقى منتشر زي محلات الكباب والكفتة، كان طبيعي أننا نبدأ نشوف مطاعم آسيوية بـ تفتح فروع جديدة وبـ تخرج بره نطاق المولات والفوود كورت، وكان آخرها فرع مطعم «الركن الآسيوي – Asian Corner» اللي فتح في ميدان الإسماعيلية في مصر الجديدة.

المطعم موجود خلف محل “السلام شوبنج سنتر” الشهير في الميدان، في شارع هادئ مش فيه محلات كثير، علشان كده هـ تلاقي لافتات دعاية إرشادية عن المكان في بداية الشارع من ناحية الميدان. دخلنا المطعم المكون من طابق واحد، مساحته متوسطة وأنيق جدًا، له واجهة زجاجية بـ تطل على الشارع، ومن الداخل ديكوراته مودرن باللون الخشبي الفاتح والإضاءة موزعة بشكل احترافي، والجدران مزينة بصور لبوذا وبعض الرسوم الآسيوية، وفيه قعدات متنوعة؛ ترابيزات وكنبات كبيرة وقعدة بار ظريفة، ومزيكا Chill Out حلوة في الخلفية، يعني الجو العام للمكان ممتاز ومختلف تمامًا طبعًا عن شكل فروع «الركن الآسيوي» الموجودة في سيتي ستارز وغيرها من المولات، والمنيو كمان شكله مختلف ومكوناته مختلفة، يعني الشيء الوحيد اللي بـ يثبت أن ده هو المكان نفسه هو الاسم واللوجو المشهور لـ Asian Corner.

المنيو داخل المطعم عبارة عن Chick List تعلم فيها على الأصناف اللي أنت عاوزها وترجعها للويتر، ومقسم لأطباق الدجاج واللحوم والكاليماري والجمبري والسمك، وصفحة ثانية للشوربة والمقبلات والسلاطات وأطباق الخضار والـ Sizzling أو المشويات على الجريل اللي بـ تتحضر أمامك، وفيه قائمة للنودلز والأرز والبط، وأخيرًا الحلويات والمشروبات. السوشي له قائمة منفصلة وتفاصيل كثير وما كانش جزء من تجربتنا في أول زيارة لنا للفرع ده، وقررنا نركز على المطبخ الآسيوي فقط ونشوف التطور اللي طرأ على المكان بعد افتتاح الفرع الكبير الشيك ده.

الأكل بدأ ينزل بعد حوالي 15 دقيقة من تحديد طلباتنا، وبدأنا بطبق مقبلات فيه 4 وحدات جمبري بالكنافة (39 جنيه) وهو طبق تايلاندي بالمناسبة، والكنافة بـ تبقى عبارة عن شعيرات مملحة بـ يتم لفها على وحدات الجمبري الكبيرة وبـ تُقلي في الزيت، وبـ تقدم مع صوص الثوم والكسبرة، طبق رائع لو بـ تحب تجرب الحاجات الغريبة، وأحسن افتتاحية لوجبة آسيوية أصيلة. بعدها بدأت تنزل الأطباق الرئيسية وهي الـ Yaki Tori أو الدجاج بصوص الترياكي (44 جنيه) البيف بالبطاطس الحارة (45 جنيه) وجربنا معاها النودلز بالخضار على الطريقة الصينية (20 جنيه) والأرز بالبيض والخضار وحبات الجمبري أو الـ Nasi gorng الأندونيسي الشهير (32 جنيه).

البيف بالبطاطس كان قطع اللحم فيه مقطعة شرائح صغيرة مع خلطة الفلفل الأخضر والبصل والكرنب وصوص الصويا وعليه مكعبات بطاطس مسلوقة، حار بدرجة متوسطة. الطعم ممتاز لكن اللحم كان محتاج تسوية زيادة شوية. الدجاج بصوص الترياكي عجبنا جدًا لكن ممكن ما يعجبش أي حد مش بـ يحب الحلو على الحادق، لأن صوص الترياكي هنا معمول بضمير لدرجة أنه يشبه “المفتقة” المصرية الأصيلة، فيه عسل وسمسم وصويا حلوة، لكن هي مكونات صوص الترياكي الياباني برضه. صدور الدجاج فيه مقطعة شرائح كبيرة وتسويتها جيدة والطعم رائع لو كنت من محبي الـ Sweet & Sour أو المطبخ الآسيوي عمومًا، والطبق ده تحديدًا معمول بحرفية عالية جدًا.

الـ Nasi goreng اللي معناه حرفيًا “الأرز المقلي” من أحسن الحاجات اللي ممكن تأكلها هنا، الطبق ينفع وجبة لوحده بسبب كمية الجمبري وقطع البيض المقلي والبسلة اللي فيه. النودلز بالخضروات طبق مناسب للنباتيين، فيه كمية معقولة من النودلز المخلوطة بالفلفل الملون والكرنب المسلوق، الملح بـ يبقى قليل في الأكل عمومًا علشان تضبطه حسب الرغبة. فيه أطباق بيف ودجاج بالماسالا الهندي والكاري وفيه تمبورا الجمبري الياباني والبط المحمر مع البان كيك. الحلويات الآسيوية كلها مقلية، موز وأناناس وآيس كريم مقلي وفيه قرع عسلي على الطريقة اليابانية، أسعار الحلو من 17 لـ 25 جنيه، وفيه مشروبات عادية باردة وساخنة بجانب الشاي الأخضر الصيني وشاي الياسمين (8 جنيه).

حبينا المكان وحبينا الكميات الكبيرة في الأطباق والخدمة المهذبة، لكن كان نفسنا يعملوا وجبات جاهزة فيها أرز وصنف أو أكثر لحوم زي ما تعودنا نشوفها في فروع الفوود كورت، أكيد ناس كثير هـ تبقى جاية بـ تدور على ده، وهـ يحتاروا لما يلاقوا كل صنف بـ يُقدم لوحده وبسعر أعلى من المعتاد.