الدار دارك.. زيارة لـ “الحاجة” في الغردقة
عنوان الحاجة في الغردقة مطاعم الغردقة مطعم الحاجة في الغردقة مطعم الدار دارك منيو مطعم الحاجة
Cairo 360
رنا شرف
قبل دخول المدارس والجامعات بنحب نسافر أماكن حلوة في مصر، ولو أنت في الغردقة يبقي لازم تزور مطعم “الدار دارك” المشهور أكتر باسم مطعم “الحاجة”.
إحنا بنتكلم عن مطعم مشهور وبيحبه كل زوار الغردقة، بيميزه جو دافئ يخليك تحس إنه بيت كبير مش مجرد مطعم.
صاحبة المطعم سيدة جميلة، بتشبه أغلب الأمهات المصريات، طيبة جدًا، وعلشان كده هي مشهورة بلقب الحاجة، وعادي جدًا وأنت في الغردقة تسمع حد بيقول للتاني: “تعالي نروح ناكل عند الحاجة”.
الحاجة بيقدم أكل مصري على أصوله من غير أي أفتكاسات، يعني هتستمتع بسلاطة خضراء مع حمام بالفريك وشوية ممبار، ويا سلام علي العظمة!
المطعم هيديك إحساس إنك في بيت مصري بسيط، و”الحاجة” صاحبة المطعم بتطبخ بنفسها، رغم إن عندها فريق عمل كبير، لكن لحد النهارده هي بتحب تشتغل بنفسها مع الفريق.
تعالوا بقي نقول لكم رأينا في الأكل:
جربنا من هناك طاجن حمام بالفريك، الطاجن كبير وحلو، بس الحمام كميته قليلة، ودي مش أحلي حاجة في المطعم بصراحة وده سعره 125 جنيه.
تاني حاجة جربناها كانت مشاوي شيش طاووق، الطعم عظمة، والطبق معمول بمزاج، والكفتة كانت خفيفة وطعمها حلو، نصف كيلو الكفتة سعره 150 جنيه ونصف كيلو الشيش سعره 90 جنيه.
كمان طلبنا مع الأكل سلاطة خضراء ودي سعرها 20 جنيه، وسلاطة طحينة بـ20 جنيه.
المطعم دافئ وجميل، وتجربتنا فيه حسستنا بجو عائلي، فلو كنتم في الغردقة لازم تجربوه.
عنوان مطعم الحاجة: شارع السنترال، متفرع من شارع شيراتون، الغردقة.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
