The Definitive Guide to Living in the Capital , Cairo , Egypt

الأكيل لقب مش بنزعل منه لأننا فعلًا بنحب الأكل، وخاصة لو حلو والقعدة شرحة وبرحه كده زي ما بيقولوا. ده اللي عجبنا لما جربنا “الخواجة كارلوس”.

ديزاين المكان حلو جدًا، فيه قعدة بره في الهواء الطلق بكراسي خشب لونها أبيض ثلجي. وصالة داخلية مكيفة، فيها كراسي خضراء وكنب. بيفصل بينهم باب حشب من بتوع زمان. المكان هادي والخدمة ممتازة.

طلبنا بيتزا سوبريم (74 جنيه)، ونقدر نقول إنها كانت تحفة. العجينة طازة، ومحشية لحمة مفرومة وسوسيس وسلامي. متغطية برشة حلوة من الجبنة الموتزاريلا. طعمها فعلًا كان حلو.

كمان طلبنا لازانيا (46 جنيه). بجد اللازنيا بتاعتهم بتأهلهم يكونوا ملوك. المكرونة مستوية صح وتحس إنهم بينقوها بالواحدة. شرائح اللازانيا معاها صوص البالونيز اللي طعمه مختلف، مع صوص أبيض وموتزاريلا. ولما سألنا عن سر الطعم ده، وكان الرد إنها جودة الخامات وشطارة الشيف.

من المقبلات طلبنا تشيكن تندر (39 جنيه)، وده شيء لو تعلمون عظيم كسعر وجودة. كانت عبارة عن قطع دجاج كرسبي، ومعاها هاني ماسترد صوص.

طبعًا الأسعار غير شاملة الضريبة، وكمان في بعض الأوقات بيبقى عندهم عازف ساكس وكمانجا. بيلعبوا علشان يضيفوا جو مميز للأكيلة اللي زينا ويفتح نفسهم أكتر. ودي صفحتهم على فيسبوك.