The Definitive Guide to Living in the Capital , Cairo , Egypt

زمان كنا لما نحب نخرج بنقول عاوزين مكان “رايق” علشان نفصل من ضغوط الحياة، وعلشان الروقان لعبتنا قررنا ندور على مكان نحس فيه بروقان حقيقي ونقعد قعدة هادية نريح أعصابنا فيها، وده اللي لقيناه في مطعم “البينللو سيراميك – Il Pennello Ceramic” المعادي، وفي السطور الجاية هنقول لكم على تفاصيل تجربتنا اللي في مجملها كانت مميزة وأكيد “رايقة”.

المكان ديكوراته كلاسيكية إيطالية، وفيه أوبن إيريا بكراسي طويلة جميلة جدًا بالليل، والمكان الداخلي فيه كنب مودرن جلد، وكراسي مريحة، ومحافظين على التباعد الاجتماعي بين الترابيزات، ومن مميزات المكان إنه قادر يستوعب أي أعداد، وكمان فريق العمل في المكان مميز ودائمًا مبتسم وبيساعدكم بحب، وهتلاقوا فيه كمان كراسي أطفال، بس خلينا نقولكم أن المكان بيقدم مشروبات روحية ضمن قائمته، علشان لو حد مابيحبش الأمر ده.

بدأنا تجربتنا بطبق فيليه مشوي سعره 199 جنيه، وطلبناه well done، وكان طعمه عظيم، ومتسوي على الجريل ومرشوش عليه ليمون في التسوية مديه طعم حكاية، وطعم الباربكيو المتزين بيه الطبق عظيم، وكمان معاه بتختاروا 2 طلب جانبي، وإحنا شخصيًا اكتفينا بطلب بطاطس بوم فريت، والحقيقة كانت مقرمشة وجميلة.

كمان جربنا من عندهم الباستا وطلبنا بلونيز سباجتي وسعرها 69 جنيه، وخلينا نقول إنه رغم أن فيه أماكن بتقدمها أحسن شوية، لكن الصوص اللي عاملينه في المكان مديها طعم مميز يخليكم تخلصوا الطبق وتطلبوا غيره كمان لو أنتم أكيلة حقيقيين.

في المجمل تجربتنا كانت إيجابية ومميزة، وهنكررها تاني أكيد، والقعدة فعلًا كانت رايقة وهادية، وفريق العمل كان متعاون وبنعتبره بالفعل أجمل حاجة في المكان.